Imanǵalı týraly túrli áńgime aıtýǵa bolady, biraq ol ekijúzdi emes — Dos Kóshim

Foto: ErtenMedia.kz

Tasmaǵambetovtiń saıası obrazyna halyqtyń kózqarasy ekiushty: biri ony tipti «bolashaq prezıdent» retinde kórse, biri «eski júıeniń adamy» dep sanaıdy, dep jazdy qandastar.kz

Osyndaı ataýly kúni ErtenMedia.kz qoǵam qaıratkeri, saıasatker Dos Kóshimnen Imanǵalı Tasmaǵambetov týraly birer aýyz pikir surady.

Dos Kóshimniń pikirinshe, Imanǵalı Tasmaǵambetov — óz kezindegi bılikke, óz kezindegi júıege qyzmet etken adam.

«Ol sol ýaqyttarda sol júıege berile qyzmet etti. Jibergen, jumsaǵan jaqtarynyń bárinde barynsha jaqsy qyzmet kórsetýge tyrysty. Qaq-soqpen isi joq. Qylmystyq isterin eshkim estimegen. Eń bastysy qazaq halqyna degen jaqsy kózqarasy bar basshylardyń bireýi», — deıdi Dos Kóshim Tasmaǵambetov týraly.

Saıasatker qoǵamda Tasmaǵambetovke qatysty jaǵymsyz pikir nelikten qalyptasqanyn da túsindirdi.

«Imanǵalı týraly áńgime kóp shyǵatyn sebebi: «eger ol jaqsy bolsa, nelikten avtorıtarlyq júıege qyzmet etti?» degen saýal. Ol kezinde totalıtarlyq júıege de qyzmet etti. Qazaqstandaǵy Komsomoldyń bastyǵy boldy. Al Komsomol degenimiz Kommýnıstik partııanyń inisi deımiz be, ekinshi kezektegi rezervi dep aıtýǵa bolady. Sondyqtan ol sol júıege de berilip qyzmet etti. Odan keıin avtokratııalyq júıege 33 jyl boıy qyzmet etti. Barynsha, berile qyzmet etti. Sondyqtan adamdarda «eger jaqsy adam bolsa, nege osy júıege qarsy shyqpaıdy?» degen suraq týyndaıtyn sııaqty», — dedi Dos Kóshim.

Qoǵam qaıratkeri Dos Kóshim Tasmaǵambetovte keıbir tanymal tulǵalar sııaqty «ekijúzdilik joq» degen pikirde.

«Ár adamnyń óziniń tańdaýy bar. Sol júıede mindetti túrde tek jaman adamdar bolady dep aıta almaımyn. Sol júıege berile qyzmet etken kóptegen azamatty bilemin. Qaıta men solardy syılaımyn. Sebebi keıbireýleri «eski Qazaqstanda jaman boldy, qazir jaqsy, men qazir Jańa Qazaqstanmyn» degendi aıtyp júr. О́zi sol eski Qazaqstanda jumys istep, Nazarbaevtyń qasynda bolǵan adamdar «soǵan qarsy shyqtyq» sııaqty máseleni kóterip júr. Tasmaǵambetov bılikte qandaı júıede bolsa da, sol júıege (eski júıege — esk.) qyzmet etetin kózqarasynda, ustanymynda qaldy. Ekijúzdilikti qabyldamaǵan sııaqty. Oǵan neni aıtsa, ony aıtsyn, «men osy júıeniń baǵytynda qalamyn» degen sııaqty», — dep túsindirdi saıasatker.

Sondaı-aq, Dos Kóshim Imanǵalı Tasmaǵambetov tuńǵysh prezıdent Nazarbaev jasaǵan tulǵa ekenin aıtty.

«Tasmaǵambetovtiń eń bir ataqty sóziniń biri: «men Nazarbaevtyń prodýktisimin». Bylaısha aıtqanda, meni Nazarbaev jasap shyǵardy degen sóz ǵoı. Ony bireýler mazaq qylǵan sııaqty aıtady. Iá, ony Nazarbaev jasap shyǵardy. Sondyqtan ol sol ýaqyttarda Nazarbaevtyń baǵytymen júrdi, sodan ajyraǵan joq. «Jańa Qazaqstanmyn» dep uran salǵanyn estigen joqpyn. «Ádiletti Qazaqstan jasaımyz» degenin estigen joqpyn. Qaıta sony aıtqan adamdardan oq boıy joǵary turdy», — dedi ol.

Saıasatker óziniń jeke kózqarasyn da bildirip, «barrıkadanyń eki jaǵynda tursaq ta, ony syılaımyn», — dedi.

«Biraq meniń saıası kózqarasyma qarsy adam. Alaıda onyń adamshylyǵyn, adamgershiligin esh ýaqytta joqqa shyǵarǵan joqpyn. Men onyń ustanymyn syılaýym kerek. Iá, ekeýmiz barrıkadanyń eki jaǵynda shyǵarmyz. Sondyqtan adamdarǵa osy máseleni túsiný kerek. Meniń oıymsha, ol sol júıege óle-ólgenshe qyzmet etetin adam bolyp qalady», — dep túıindedi saıasatker.

Tasmaǵambetov týraly derek

Imanaǵalı Tasmaǵambetov 68 jasta. Ol Nazarbaevtyń keńesshisi, premer-mınıstr orynbasary, Atyraý oblysynyń ákimi, Almaty qalasynyń ákimi, Astana qalasynyń ákimi, qorǵanys mınıstri sekildi jaýapty qyzmetterdi atqardy.

Tasmaǵambetov áli kúnge deıin saıası arenadan alystamady. Keıingi jyldary elshilik qyzmetterde de boldy. 2017 jylǵy 3 aqpannan 2019 jylǵy 18 jeltoqsanǵa deıin Qazaqstannyń Reseı Federaııasyndaǵy tótenshe jáne ókiletti elshisi boldy.

Qazir ol — UQShU bas hatshysy.