ءىس بارىسىندا قالدىبەكقىزىنا قارسى ورەسكەل زاڭسىزدىقتار ورىن العان

قىسقاشا ءانارۋدىڭ ىسىنە قاتىستى ماعلۇماتتاردى سىزدەرمەن ءبولىسىپ قويايىن.

1. تاۋەلسىز ساراپتاما جاسالدى. قورىتىندى قولىمىزدا. ال تەرگەۋ تاعايىندانداعان ساراپتاما ءالى دايىن ەمەس.

2. تەرگەۋشىنىڭ ءىس-ارەكەتىنە قىلمىستىق -پروتسەستىك كودەكستىڭ 105-بابىنا سايكەس, پروكۋراتۋراعا شاعىم ءتۇسىرىلدى. ءىس قازىر پروكۋراتۋرادا. اۋەزوۆ اۋداندىق پوليتسيا ءبولىمىنىڭ تەرگەۋشىسى د.ساعىمبەكوۆ 20-تامىز كۇنى ەكى تاراپتى بەتتەستىرۋ كەزىندە ورەسكەل پروتسەسسۋالدىق قاتەلىكتەرگە, ياعني زاڭسىزدىقتارعا جول بەرگەن.
اتاپ ايتقاندا, جابىرلەنۋشىگە قۇقىقتارى, ياعني ادۆوكات الۋ قۇقىعى بارى تۇسىندىرىلمەگەن. ءتىپتى بەتتەستىرۋ تەرگەۋ امالى جۇرگىزىلەتىنىن دە ەسكەرتپەي, «كەلىپ كەتىڭىز» دەپ, شاقىرىپ العان. ال ەكىنشى تاراپ ەكى ادۆوكاتىمەن كەلگەن.
تەرگەۋشى تاراپىنان انارۋعا مورالدىق قىسىم جاسالعان. سوزدەرى مەن ارەكەتتەرىنەن تۇراروۆقا بولىسىپ, «سەنى زورلاعان جوق قوي, ءوز ەركىڭمەن بولدىڭ عوي» دەپ, قايتا-قايتا ايتىپ, سول ءسوزدى قوستىرعان. دەنە جاراقاتتارىن سوت – مەديتسينالىق ساراپشىسى لينەيكامەن ولشەپ, تەكسەرگەن. ال تەرگەۋشى دەنە جاراقاتتارىم جوق دەپ ايتقىزعان. حاتتاما سوڭىنداعى ءانارۋ جازعان قيسىق جازۋلاردان – اق قولدارى دىرىلدەپ, قىسىم ۇستىندە جازعان ادامنىڭ پوچەركى ەكەنىن اڭعارۋ قيىن ەمەس.
ودان وزگە, جابىرلەنۋشىگە 25 سۇراق, ال تۇراروۆقا 1-اق سۇراق قويعاندىعى, ارىزدانۋشىنىڭ ءار ءۋاجىن كۇدىكتىدەن سۇراپ, ناقتىلاماعانى, ونىڭ جاۋابىن تەكسەرمەگەنى دە تەرگەۋ امالىنىڭ بىرجاقتى وتكىزىلگەنىنىڭ دالەلى. بەينەتاسپا جۇرگىزىلمەگەنى دە وسىنى ايعاقتاپ تۇر.

3. وسى اتالعاندار نەگىزىندە 20-تامىز كۇنى وتكىزىلگەن بەتتەستىرۋ حاتتاماسىن زاڭسىز دەپ تانىپ, كۇشىن جويىپ, قايتادان جابىرلەنۋشىنىڭ ادۆوكاتتارىنىڭ قاتىسۋىمەن بەتتەستىرۋ جانە قوسىمشا جاۋاپ الۋ تۋرالى تالاپ قويىلدى.

4. ءانارۋدى قورعاۋشى تاراپقا تاعى ءبىر ادۆوكات قوسىلدى. ۇزاق جىلدار تەرگەۋ سالاسىندا ىستەگەن, الماتى قالالىق ادۆوكاتتار القاسىنىڭ مۇشەسى, بىلىكتى مامان ايلان ەسكەروۆ مىرزامەن بىرىگىپ, جۇمىس ىستەپ جاتىرمىز. تاعى دا كومەكتەسەمىز دەگەن قورعاۋشىلار از ەمەس. ازىرگە ەكى قورعاۋشىمەن شەكتەلىپ وتىرمىز.

5. ءبىزدىڭ ەلدە ادىلدىك ورناماي, سىبايلاس جەمقورلىقتار ورىن السا, ادام, ايەل قۇقىعىن قورعايتىن حالىقارالىق ۇيىمدارمەن بىرلەسىپ, جۇمىس ىستەيمىز. پرەزيدەنتكە, پارلامەنت دەپۋتاتتارىنا ۇندەۋ جاسايمىز.(جوسپاردا بار)

6. المالى اۋد.پوليتسيا بولىمىنە ءانارۋدىڭ 2018 جىلى ج.تۇراروۆتىڭ ۇستىنەن زورلاۋ فاكتىسى ورىن العانى تۋرالى ارىزىن ارحيۆتەن كوتەرۋ تۋرالى ادۆوكاتتىق سۇراۋ جولداندى.

7. جەتىسۋ اۋد.پوليتسياسىنىڭ قىزمەتكەرى تاراپىنان ورىن العان ازاپتاۋ فاكتىسى بويىنشا ءا.قۇرمانالىنىڭ 2023 جىلعى جازعان ارىزى بويىنشا ادۆ.سۇراۋ جولداندى.
جاۋاپتارى ءالى كەلگەن جوق.

قىسقاشا اتقارىلعان ءىس-شارالار جونىندە اقپارات وسى.
قوعام ويانىپ كەلەدى. اۋەزوۆ جازعان قورعانسىزدىڭ كۇنى ءبىزدىڭ زاماندا وزەكتىلىگىن جويماعانىنا – ءانارۋ ءىسى دالەل. ءانارۋدىڭ تاعدىرى-كوپتەگەن قازاق قىزدارىنىڭ تاعدىرى, ىشتەرىندە تۇنشىعىپ جاتقان قايعى-مۇڭى. قازاق ازاماتى قارىنداستىڭ ارى ءۇشىن اتقا قونىپ, جاۋعا دا شاپقان زامان ارتتا قالسا كەرەك..اعا دەپ العاۋسىز, تازا كوڭىلمەن سەنگەن ەركەكسىماقتاردىڭ كوپشىلىگىنىڭ (بارىنە توپىراق شاشپايمىن, قازاقتا ازامات اتىنا لايىق ەرلەر كوپ) بەت-بەينەسى-جانقوش ىسپەتتەس. بۇل ءىس قوعامنىڭ جارىلۋعا شاق تۇرعان ءىرىڭىن اشقانداي بولدى.

ءلاززات احاتوۆا, زاڭگەر, قورعاۋشى