ىشكى ىستەر مينيسترلىگى ماڭىزدى مالىمدەمە جاسادى

فوتو: ءىىم

قازاقستاننىڭ ىشكى ىستەر مينيسترلىگى قۇقىق ءتارتىبىن جانە كەز كەلگەن زاڭ بۇزۋشىلىقتار ءۇشىن جازانىڭ بۇلتارتپاستىعىن قامتاماسىز ەتۋ بويىنشا شارالاردى كۇشەيتتى, دەپ جازادى qandastar.kz

ۆەدومستۆو باسشىسى, ىشكى ىستەر مينيسترلىگىنىڭ رەسمي وكىلى شىڭعىس الەكەشەۆ اتاپ وتكەندەي, ۆەدومستۆونىڭ باستى ۇستانىمى – زاڭدىلىق.

«ءىىم وزىندىك قاۋىپسىزدىك دەپارتامەنتى جەدەل باسقارۋ ورتالىقتارى مەن پاترۋلدىك قىزمەتتىڭ جۇمىسىن بەلسەندى قاداعالاۋدا. جەدەل باسقارۋ ورتالىقتارى پاترۋلدىك پوليتسەيلەردىڭ جۇمىسىن تاۋلىك بويى باقىلاۋدا ۇستايدى. قىزمەتكەرلەر وزدىگىمەن سوندىرە المايتىن «سمارتجەتوندارمەن» جابدىقتالعان. بۇل قۇرىلعىلار بەلگىلەنگەن تالاپتاردان اۋىتقۋعا مۇمكىندىك بەرمەيدى, بارلىق ارەكەتتەر ۇنەمى جازىلىپ وتىرادى», – دەدى شىڭعىس الەكەشەۆ.

سونىمەن قاتار, ونىڭ ايتۋىنشا, جاساندى ينتەللەكتپەن بىرىكتىرىلگەن بەينەباقىلاۋ كامەرالارىنان الىنعان دەرەكتەردى تالدايتىن جۇيە قولدانىلادى. بۇل كەز كەلگەن بۇزۋشىلىقتاردى انىقتاۋعا جانە ولارعا جەدەل ارەكەت ەتۋگە مۇمكىندىك بەرەدى.

«پوليتسيانىڭ جۇمىسى ءاربىر زاڭ بۇزۋشىنى ونىڭ مارتەبەسى مەن لاۋازىمىنا قاراماستان ءتيىستى جاۋاپكەرشىلىككە تارتۋعا باعىتتالعان. ەشكىمگە ەشقانداي ارتىقشىلىق بەرىلمەيدى. پاترۋلدىك پوليتسەيلەر زاڭ تالاپتارىن قاتاڭ تۇردە ساقتايتىنىن اتاپ وتكىم كەلەدى. ولاردىڭ تاراپىنان كەز كەلگەن زاڭسىز ارەكەتتەر ءۇشىن سايكەسىنشە جاۋاپكەرشىلىك كوزدەلگەن. ءبىز ازاماتتاردى زاڭدى ساقتاۋعا, پوليتسەيلەردىڭ زاڭدى تالاپتارىن ورىنداۋعا, لاۋازىمدى تۇلعالارعا پارا ۇسىنۋ ارەكەتتەرىنە بارماۋعا شاقىرامىز», – دەدى شىڭعىس الەكەشەۆ.

ءىىم جانە سىبايلاس جەمقورلىققا قارسى قىزمەت اراسىندا ءتيىستى مەموراندۋمعا قول قويىلعانىن ەسكە سالامىن. ونىڭ اياسىندا جەمقورلىقپەن كۇرەس ودان ءارى نىعايا تۇسپەك, دەپ اتاپ ءوتتى الەكەشەۆ.

«ەگەر سiز قىزمەتكەرلەردىڭ ادەپسىز ءىس-ارەكەتتەرىنىڭ كۋاسى بولساڭىز, دەرەۋ ءىىم وزىندىك قاۋىپسىزدىك دەپارتامەنتىنە نەمەسە 1402 سەنىم تەلەفونىنا حابارلاسىڭىز. تەك بىرلەسە جۇمىس ىستەي وتىرىپ, ءبىز قوعامدا قاۋىپسىزدىكتى, قۇقىقتىق ءتارتىپتى جانە ادىلەتتىكتى قامتاماسىز ەتە الامىز», – دەدى دەپارتامەنت باستىعى – ءىىم رەسمي وكىلى شىڭعىس الەكەشەۆ.