جاڭالىقتار
“يزرايل بيلىگى مەنى ولتىرمەك بولدى”. يران پرەزيدەنتى شۇعىل مالىمدەمە جاسادى

يران پرەزيدەنتى ماسۋد پەزەشكيان يزرايل بيلىگى وعان قاستاندىق جاساماق بولعانىن, بىراق ساتسىزدىككە ۇشىراعانىن مالىمدەدى, دەپ حابارلايدى Qandastar.kz.
«ءيا, ولار (قاستاندىق جاساۋعا — رەد.) ارەكەت ەتتى, بىراق ساتسىزدىككە ۇشىرادى», — دەدى يران پرەزيدەنتى امەريكالىق جۋرناليست تاكەر كارلسونعا بەرگەن سۇحباتىندا.
پرەزيدەنتتىڭ ايتۋىنشا, قاستاندىق ارەكەتى شامامەن ءبىر جارىم اپتا بۇرىن جاسالعان. ول اقش-تىڭ بۇل ىسكە ەش قاتىسى جوق ەكەنىن اتاپ ءوتتى. قاستاندىقتىڭ ارتىندا يزرايل بيلىگى تۇرعانىن ناقتى ايتتى.
«مەن سول ۋاقىتتا جينالىستا بولدىم. ءبىز الداعى قادامدارىمىزدى تالقىلاپ جاتقان ەدىك. يزرايلدىكتەر ءوز تىڭشىلارىنان العان بارلاۋ مالىمەتتەرىنە سۇيەنە وتىرىپ, ءبىز بولعان اۋدانعا سوققى بەرمەك بولدى. بىراق ادام ءومىرى — اللانىڭ قولىندا. سەرىكتەستەرىم سياقتى مەن دە يراننىڭ تاۋەلسىزدىگى مەن ەگەمەندىگى جولىندا جانىمدى بەرۋگە دايىنمىن», — دەدى يران پرەزيدەنتى.