جاڭالىقتار
«قابىرعاسى سىنىپ, ميى شايقالعان»: قازاقستاندىق فۋتبولشى الاياقتىق ارەكەتى ءۇشىن سوتتالدى
فوتو: اشىق دەرەككوز
«سەمەي-2», «اقجايىق» كلۋبىندا ويناعان قازاقستاندىق فۋتبولشى الاياقتىق جانە دەنساۋلىققا زيان كەلتىرۋ باپتارى بويىنشا سوتتالدى. دەرەكتەرگە سۇيەنسەك, ول تانىستارىنان ءىرى كولەمدە نەسيەگە اقشا العىزىپ, كەيىن قايتارماي الداپ كەتكەن, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.
“موي گورود” پورتالىنىڭ دەرەگىنشە, سەمەي قالاسىنىڭ № 2 سوتىندا 36 جاستاعى ەكس-فۋتبولشى ازات ەرعاليموۆقا قاتىستى قىلمىستىق ءىس قارالدى. وعان قىلمىستىق كودەكستىڭ ەكى بابى (“الاياقتىق” جانە “ورتاشا اۋىرلىقتاعى دەنساۋلىققا زيان كەلتىرۋ”) بويىنشا ايىپ تاعىلدى.
ەرعاليموۆ فۋتبولداعى مانسابىن 2005 جىلى «سەمەي-2″كلۋبىنىڭ قۇرامىندا باستاعان. كەيىن ءار جىلدارى ەلىمىزدىڭ ءتۇرلى كلۋبتارىندا, سونىڭ ىشىندە ورالدىڭ «اقجايىق» كلۋبىندا ويناعان. ول كلۋب قۇرامىندا 2017-2018 جىلداردا بولعان.
ءىس ماتەريالدارىنان ونىڭ 2022 جىلدان 2023 جىلعا دەيىن تۋىستارىنان, دوستارىنان جانە تانىستارىنان ءتۇرلى سىلتاۋلارمەن قارىز العانى بەلگىلى بولدى. جابىرلەنۋشىلەردىڭ جالپى شىعىنى 60 ميلليون تەڭگەگە جەتكەن. قىلمىستىق ءىس 32 ەپيزودتان تۇردى. سونىمەن قاتار كوپتەگەن ادامدار ەرعاليموۆ ءۇشىن نەسيە الىپ, قارىزعا باتۋعا ءماجبۇر بولعان. مىسالى, جابىرلەنۋشىلەردىڭ ءبىرى ەرعاليموۆقا ءۇش رەت 4 ميلليون تەڭگەگە جۋىق نەسيە الىپ بەرگەن. العاش رەت فۋتبولشى قارجىلىق ماسەلەرىم بار دەگەن سىلتاۋىمەن اقشا سۇراعان. ەكىنشىسىندە الماتىدا بيزنەس اشۋ ءۇشىن, ۇشىنشىسىندە كەيبىر جاعدايلاردى شەشۋ ءۇشىن سۇراعان. ال جابىرلەنۋشى ونىڭ وتىنىشىنەن باس تارتا الماي, ءارتۇرلى بانكتەردەن نەسيەگە اقشا العان. ىستە ونداعان جابىرلەنۋشىلەردىڭ اتى-ءجونى كورسەتىلدى.
سونداي-اق ءىس ماتەريالدارىندا ازات ەرعاليموۆتىڭ قارىزىن سۇراپ كەلگەن تانىسىن ۇرىپ جاراقات سالعانى تۋرالى دا ايتىلعان. دارىگەرلەر قويعان ساراپتاما بويىنشا جابىرلەنۋشىنىڭ قابىرعاسى سىنىپ, ميى شايقالعان.
ەرعاليموۆتىڭ ءوزى بارلىق ايىپتار بويىنشا كىناسىن تولىق مويىندادى.
سوت ۇكىمىمەن ازات ەرعاليموۆ قىلمىستىق كودەكستىڭ ەكى بابى بويىنشا كىنالى دەپ تانىلدى. وعان 3 جىل 2 اي مەرزىمگە باس بوستاندىعىنان ايىرۋ جازاسى تاعايىندالدى. فۋتبولشى مەرزىمىن ورتاشا قاۋىپسىزدىك قىلمىستىق-اتقارۋ جۇيەسى مەكەمەسىندە وتەيدى.
دەرەكتەرگە سۇيەنسەك, سپورتشىنىڭ بۇل ارەكەتى ونىڭ لۋدومانيا اۋرۋىنا بايلانىستى بولعان.
