«Qabyrǵasy synyp, mıy shaıqalǵan»: Qazaqstandyq fýtbolshy alaıaqtyq áreketi úshin sottaldy

Foto: ashyq derekkóz

«Semeı-2», «Aqjaıyq» klýbynda oınaǵan qazaqstandyq fýtbolshy alaıaqtyq jáne densaýlyqqa zııan keltirý baptary boıynsha sottaldy. Derekterge súıensek, ol tanystarynan iri kólemde nesıege aqsha alǵyzyp, keıin qaıtarmaı aldap ketken, dep habarlaıdy  qandastar.kz  Skifnews.kz aqparat portalyna silteme jasap.

“Moı gorod” portalynyń dereginshe, Semeı qalasynyń № 2 sotynda 36 jastaǵy eks-fýtbolshy Azat Erǵalımovqa qatysty qylmystyq is qaraldy. Oǵan qylmystyq kodekstiń eki baby (“alaıaqtyq” jáne “ortasha aýyrlyqtaǵy densaýlyqqa zııan keltirý”) boıynsha aıyp taǵyldy.

Erǵalımov fýtboldaǵy mansabyn 2005 jyly «Semeı-2″klýbynyń quramynda bastaǵan. Keıin ár jyldary elimizdiń túrli klýbtarynda, sonyń ishinde Oraldyń «Aqjaıyq» klýbynda oınaǵan. Ol klýb quramynda 2017-2018 jyldarda bolǵan.

Is materıaldarynan onyń 2022 jyldan 2023 jylǵa deıin týystarynan, dostarynan jáne tanystarynan túrli syltaýlarmen qaryz alǵany belgili boldy. Jábirlenýshilerdiń jalpy shyǵyny 60 mıllıon teńgege jetken. Qylmystyq is 32 epızodtan turdy. Sonymen qatar kóptegen adamdar Erǵalımov úshin nesıe alyp, qaryzǵa batýǵa májbúr bolǵan. Mysaly, jábirlenýshilerdiń biri Erǵalımovqa úsh ret 4 mıllıon teńgege jýyq nesıe alyp bergen. Alǵash ret fýtbolshy qarjylyq máselerim bar degen syltaýymen aqsha suraǵan. Ekinshisinde Almatyda bıznes ashý úshin, úshinshisinde keıbir jaǵdaılardy sheshý úshin suraǵan. Al jábirlenýshi onyń ótinishinen bas tarta almaı, ártúrli bankterden nesıege aqsha alǵan. Iste ondaǵan jábirlenýshilerdiń aty-jóni kórsetildi.

Sondaı-aq is materıaldarynda Azat Erǵalımovtyń qaryzyn surap kelgen tanysyn uryp jaraqat salǵany týraly da aıtylǵan. Dárigerler qoıǵan saraptama boıynsha jábirlenýshiniń qabyrǵasy synyp, mıy shaıqalǵan.

Erǵalımovtyń ózi barlyq aıyptar boıynsha kinásin tolyq moıyndady.

Sot úkimimen Azat Erǵalımov Qylmystyq kodekstiń eki baby boıynsha kináli dep tanyldy. Oǵan 3 jyl 2 aı merzimge bas bostandyǵynan aıyrý jazasy taǵaıyndaldy. Fýtbolshy merzimin ortasha qaýipsizdik qylmystyq-atqarý júıesi mekemesinde óteıdi.

Derekterge súıensek, sportshynyń bul áreketi onyń lýdomanııa aýrýyna baılanysty bolǵan.