«قاي جۇزدەن ەكەنىن سۇرايدى». قازاقستاندا ايەلدەر سپەرما دونورىن قالاي تاڭدايدى?

فوتو: Tengrinews.kz / تۇرار قازانعاپوۆ

رەپرودۋكتيۆتى مەديتسينا ينستيتۋتىنىڭ ۋرولوگ-اندرولوگ دارىگەرى رومان بەزرۋكوۆ قازاقستاندا سپەرما دونورى بولۋ جايلى بىرنەشە ماڭىزدى سۇراققا جاۋاپ بەردى, — دەپ حابارلايدى Massaget.kz تىلشىسى «Tengrinews.kz«-كە سىلتەمە جاساپ.

ۋرولوگ قانداي ەر ادامدار سپەرما دونورى بولا الاتىنىن ايتتى.

«ول 18-35 جاس ارالىعىنداعى دەنى ساۋ ەر ادام بولۋى كەرەك. سونداي-اق ونىڭ سوزىلمالى اۋرۋلارى مەن زياندى ادەتتەرى بولماۋى كەرەك. ەر ادام تولىققاندى تەكسەرىستەن سوڭ عانا دونور بولۋعا جىبەرىلەدى», — دەيدى ول.

دارىگەر كوپشىلىك ەر ادام اقشاسى ءۇشىن دونور بولاتىنىن جاسىرمادى.

ء«بىر رەت سپەرما پورتسياسىن تاپسىرۋ 40 مىڭ تەڭگە تۇرادى. ۇستاپ قالاتىن سالىعىن ەسەپتەگەندە, قولعا 36 مىڭ تەڭگە الادى. الايدا ودان بيزنەس جاساۋ مۇمكىن ەمەس. ءبىز ماكسيمۋم 20-25 پورتسيا قاتىرىپ قويا الامىز. ودان دۇنيەگە كەلگەن بالا سانى 10-عا جەتكەندە, قالعان سپەرما پورتسياسى جويىلادى», — دەيدى رومان بەزرۋكوۆ.

ايەل دونوردىڭ سۋرەتىن كورە المايدى. الايدا ەگەر دونور قارسى بولماسا, ونىڭ بالا كەزىندەگى سۋرەتىن كورسەتە الادى.

«قازاقتار ءۇشىن بويى, شاشىنىڭ ءتۇسى جانە باسقا دا بەلگىلەردەن بولەك ەر ادامنىڭ قاي جۇزدەن ەكەنىن ءبىلۋ ماڭىزدى. ال ورىستار ونىڭ شاشىنىڭ قويۋ نەمەسە اشىق ەكەنىن بىلگىسى كەلەدى. ءبىز دونورلاردىڭ ءجۇزىن سۇراپ, جازىپ الامىز. ادەتتە ءبىز دونور سپەرماسىن وتباسىلى جۇپتارعا بەرەمىز. اسىرەسە, ەر ادام بەدەۋلىگى بار نەمەسە مانساپ جولىندا ءجۇرىپ, رەپرودۋكتيۆتى جاستى وتكىزىپ العان ايەلى بار وتباسىلارعا بەرەمىز. ءجيى جاسى ۇلعايعان ايەلدەر كەلەدى. قازىر كەلەتىن جالعىزباستى ايەلدەر دە كوپ», — دەدى ۋرولوگ-اندرولوگ.