«قايرات» قاقپاشىسى تەمىرلان اناربەكوۆتى الماستىرعان شەرحان قالمۇرزا قانداي ويىنشى?

فوتو: f.c.kairat

«قايراتتىڭ» جاس قاقپاشىسى شەرحان قالمۇرزا وتكەن اپتادا قپل-دا نەگىزگى كوماندا ساپىندا دەبيۋت جاسادى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.
14 قىركۇيەك 2025 جىل. قازاقستان پرەمەر-ليگاسىنىڭ ورتالىق ويىنى – «اقتوبە» مەن «قايرات» اراسىنداعى تارتىستى ماتچ. ادەتتەگىدەي قاقپادا تەمىرلان اناربەكوۆ سەنىمدى ونەر كورسەتىپ تۇرعان ەدى. الايدا ءبىرىنشى تايمنىڭ ورتاسىندا كۇتپەگەن جاعداي ورىن الدى: نەگىزگى قاقپاشى اۋىر جاراقات الىپ, الاڭدى ەرتە تاستاۋعا ءماجبۇر بولدى. وسى ساتتەن باستاپ كوپشىلىك نازارىندا اتى سيرەك اتالاتىن جاس قاقپاشى – 18 جاستاعى شەرحان قالمۇرزا قالدى.

ەموتسيالار مەن العاشقى قادام

شەرحان الاڭعا شىققان ساتتە ستاديونداعى اتموسفەرا ەرەكشە وزگەردى. جانكۇيەرلەر جاس ويىنشىنىڭ قوبالجۋىن سەزگەندەي بولدى. اسىرەسە, «قايرات» – «سەلتيك» كەزدەسۋىندە ول الاڭ جيەگىندە قاتتى تولقىپ, ەموتسياعا بەرىلگەن ءساتى الەۋمەتتىك جەلىلەردە ۇلكەن رەزونانس تۋدىرعان ەدى. جانكۇيەرلەر ونى شىنايىلىعى ءۇشىن قولداپ, «مەم-قاھارمان» دەپ اتاعان بولاتىن.
بۇل جولى دا شەرحاننىڭ ءاربىر ارەكەتى نازاردان تىس قالمادى. ول جاس بولسا دا, سەنىمدى ويناپ, قاقپادا ءوزىن كورسەتە ءبىلدى.

قىسقا ۋاقىتتاعى ۇزاق جول

شەرحان قالمۇرزا – «قايرات» اكادەمياسىنىڭ تۇلەگى. 2007 جىلى تۋعان جاس قاقپاشى بويى 187 سم, سالماعى 75 كەلى. جاسوسپىرىمدەر فۋتبولىنان باستاپ, كلۋب جۇيەسىندە بىرتىندەپ وسكەن ول 2023 جىلدان بەرى QJ League تۋرنيرلەرىندە تاجىريبە جيناقتاپ كەلەدى.

2023 جىلعى QJ League ستاتيستيكاسى:

– 8 ماتچ, 154 مينۋت الاڭدا

– 5 سەيۆ, 0 قۇرعاق ماتچ

2024 جىلعى QJ League كورسەتكىشى:

– 17 ماتچ, 1002 مينۋت

– 19 سەيۆ, 4 قۇرعاق ويىن

– 7 جىبەرگەن گول, 1 سارى قاعاز

بۇل دەرەكتەر ونىڭ بىرتىندەپ تۇراقتى قاقپاشىعا اينالىپ كەلە جاتقانىن دالەلدەيدى.

جاستار قۇراماسى جانە حالىقارالىق ارەنا

شەرحان تەك كلۋبتىق دەڭگەيدە عانا ەمەس, ۇلتتىق جاستار قۇراماسىندا دا ءوزىن كورسەتىپ ۇلگەردى.

• قازاقستان U-17: 3 ماتچ, 270 مينۋت (ەۋرو-2023/24 ىرىكتەۋ).

• قازاقستان U-19: 1 ماتچ, 90 مينۋت (سلوۆەنياداعى حالىقارالىق تۋرنير).

• قايرات-جاستار: 7 ماتچ (2025 جىلعى 1-ليگا), 630 مينۋت.

• يۋنوشەسكايا ليگا ۋەفا 2024/25: 1 ماتچ, 74 مينۋت.

• قايرات (قازاقستان چەمپيوناتى 2025): 1 ماتچ, 78 مينۋت.

• چەمپيوندار ليگاسى 2025/26: العاشقى ويىنعا قاتىسۋ مۇمكىندىگى.

جاس قاقپاشى ءۇشىن مۇنداي تاجىريبەلەر وتە قۇندى. اسىرەسە, چەمپيوندار ليگاسى دەڭگەيىندە الاڭعا شىعۋ مۇمكىندىگى – كەز كەلگەن ويىنشى ءۇشىن ەرەكشە ءسات.

قازىر «قايراتتىڭ» نەگىزگى قاقپاشىلارى – تەمىرلان اناربەكوۆ پەن دميتري زارۋتسكي جاراقات الىپ, قالپىنا كەلۋ كەزەڭىندە. وسىعان بايلانىستى كلۋب باسشىلىعى شەرحان قالمۇرزانى باستى ۇمىتكەر رەتىندە قاراستىرىپ وتىر. ول الداعى چەمپيوندار ليگاسىنىڭ ماتچتارىندا قاقپادا تۇرۋى ابدەن مۇمكىن.

بۇل – ونىڭ مانسابىنداعى ۇلكەن سىناق ءارى مۇمكىندىك. 18 جاسىندا قازاقستان چەمپيونى اتانعان كلۋبتىڭ نەگىزگى قۇرامىندا ويناۋ, ەۋروپانىڭ باستى ارەناسىندا ءوزىن كورسەتۋ – جاس قاقپاشىنىڭ بەدەلىن ارتتىرىپ قانا قويماي, بولاشاعىنا دا جول اشادى.

شەرحان قالمۇرزا قازىرگى تاڭدا تەك قانا «قايرات» جانكۇيەرلەرىنىڭ ەمەس, بۇكىل قازاقستاندىق فۋتبول سۇيەر قاۋىمنىڭ نازارىندا. ونىڭ ويىنعا دەگەن قۇشتارلىعى, ەموتسياعا تولى ساتتەرى, ەڭبەكقورلىعى مەن توزىمدىلىگى الداعى ۋاقىتتا ۇلكەن ناتيجەلەرگە جەتكىزۋى مۇمكىن.

قازىرگى جاعداي – كۇتپەگەن مۇمكىندىك. ەگەر ول وسى ءساتتى پايدالانىپ, سەنىمدى ويىنىمەن كوزگە تۇسسە, وندا قازاقستان فۋتبولى جاڭا جۇلدىزدى قاقپاشىمەن تولىققانى ءسوزسىز.

ەسكە سالايىق, «قايرات» فۋتبول كلۋبى چەمپيوندار ليگاسىنىڭ توپتىق كەزەڭىندەگى العاشقى تۋردا پورتۋگاليانىڭ «سپورتينگ» كومانداسىنا قارسى وينايدى. بۇل ويىن 18-قىرگۇيەكتەن 19-نا قاراعان ءتۇنى قازاقستان ۋاقىتىمەن 00:00 دە ليسسابونداعى «جوزە الۆالادە» ستاديونىندا وتەدى. ءدال وسى ماتچتا شەرحان قالمۇرزا كارى قۇرلىقتىڭ ەڭ باستى تۋرنيرىندە دەبيۋت جاساۋى مۇمكىن.