قايرات نۇرتاستىڭ ايەلى ءتورت بالاسىمەن باسپاناسىز قالدى

فوتو: الەۋمەتتىك جەلىدەن

قايرات نۇرتاستىڭ ايەلى جۇلدىز ابدىكارىموۆا Instagram-داعى پاراقشاسىندا ءوزىنىڭ 4 بالاسىمەن باسپاناسىز قالعانىن ايتتى, دەپ حابارلادى qandastar.kz turkystan.kz سىلتەمە جاساپ. ول كومپانيا باسشىلارى مەن ءبىر توپ ادامنىڭ قۇربانى بولعان.

سول جىلى بالالارىم «اناشىم, جەر ۇيگە كوشەيىكشى! ءوزىمىزدىڭ اۋلامىز بولسا, باقشاسىنا جەمىستەر ەگەيىك» دەپ سۇرادى. بۇل وي ماعان دا ۇنادى. سول ساتتەن باستاپ ءۇي ىزدەۋگە كىرىستىم. ءوز پاتەرىمدى ساتۋعا شىعارىپ, تەز ارادا كوشكىم كەلدى. بار ويىم ءۇيىمدى ساتىپ, جەر ءۇي سالۋ نەمەسە ساتىپ الۋ بولدى. استاناداعى كوتتەدج سالاتىن بىرنەشە كومپانيالارعا دا باردىم. سول ىزدەنىستە جۇرگەندە قۇرىلىس كومپانياسىنىڭ نەگىزىن قالاۋشى ديليارا ەسىمدى كەلىنشەكپەن تانىستىم. ول ماعان «سەن ساتۋعا قويعان پاتەرىڭدى مەنىڭ ءىنىم دياردىڭ اتىنا جازىپ بەرەسىڭ. ءبىز ساعان قالاشىقتان 1 جىلدا ەكى قاباتتى جەر ءۇي سالىپ بەرەمىز. ال وعان دەيىن سەن پاتەر جالداپ تۇرارسىڭ» دەدى. مەن كەلىسە كەتتىم. ويىمداعى ءۇيدىڭ تابىلعانىنا قۋانعانىم دا راس, – دەدى جۇلدىز ابدىكارىموۆا.

الايدا سودان بەرى ارادا 2 جىل وتكەن جانە ول بالالارىمەن پاتەردەن-پاتەرگە كوشىپ شارشاعان.

2024 جىلدىڭ كوكتەمىندە مەنىڭ ءۇيىمنىڭ جاقىن ارادا بىتپەيتىنىن ءتۇسىنىپ, ديليارانىڭ الدىنا باردىم. بۇدان ارتىق كۇتە المايتىنىمدى جەتكىزىپ, ءوز ءۇيىمدى قايتارىپ بەرۋىن سۇرادىم. سول كەزدە ول مەنىڭ پاتەرىمدى بانككە كەپىلدىككە (زالوگقا) تىككەنىن ەستىرتىپ, ول ۇيدە تاعى ءبىر ءىنىسى ءابىلحان وتباسىمەن تۇرىپ جاتقانىن, قايتارىپ بەرمەيتىنىن ايتتى. جاقسى وعان دا كوندىم, مىناۋ بىتپەي تۇرعان جەر ءۇيىمدى ءوزىم اياقتايىن, سونىڭ قۇجاتىن بەرشى دەدىم. اكىمدىكتەن وبەكتىنى پايدالانۋعا قابىلداۋ اكتىسىن جاساتپاق بولدىم. بىراق سوعىلىپ جاتقان ۇيگە دە, جەرگە دە قۇجات بەرمەدى, – دەيدى ول.

ايتۋىنشا, بۇل ءۇيدى «اگرارلىق كرەديتتىك كورپوراتسياعا» كەپىلدىككە سالىپ جىبەرگەن.

ءبىر قىزىعى, اۋداندىق سوتقا باراردا ديليارا جەڭىلەتىنىمدى ايتتى. مەن قازاقستان رەسپۋبليكاسىنىڭ ازاماتشاسى رەتىندە قۇقىعىم تاپتالىپ, الدانىپ جاتقاندىعىم تۋرالى پوليتسياعا شاعىم ءتۇسىردىم. الايدا ولار ءىس قوزعامادى. زاڭ بويىنشا اۋداندىق سوتقا شاعىمداندىم. سوت شەشىمى مەنىڭ پايداما شەشىلمەگەندىكتەن, قالالىق سوتتىڭ اپەللياتسيالىق القاسىنا شاعىم تۇسىرۋگە ءماجبۇر بولدىم, – دەيدى جۇلدىز ابدىكارىموۆا.