فوتو:Stan.kz

قايرات ساتىبالدىنىڭ دۋبايداعى قىمبات كولىكتەرى ساتىلدى. بۇل تۋرالى qandastar.kz اقپارات اگەنتتىگى ينفورمبيۋروباعدارلاماسىنا سىلتەمە جاساپ حابارلايدى.

قايتارىلعان اكتيۆتەردى باسقارۋ جونىندەگى كومپانيا شامامەن 31,5 ميلليون تەڭگەگە باعالانعان Aston Martin Vantage كولىگىن ساتتى. تاعى ءبىر ليۋكس ساناتتاعى كولىك Rolls-Royce Cullinan كولىگى 167,5 ميلليون تەڭگەگە باعالاندى.

بۇعان دەيىن كاسىپكەر مەملەكەتكە Bentley, Lexus جانە Mercedes سياقتى 29 كولىكتى قايتارعان. ساتىبالدىعا تيەسىلى الماتىداعى «بايسات» ساۋدا ورتالىعى قازان ايىندا اكتيۆتەردى باسقارۋشى كومپانيانىڭ بالانسىنا وتكەن. قايتارىلعان اكتيۆتەردىڭ جالپى سوماسى شامامەن 733 ملرد تەڭگەنى قۇرايدى. تۇسكەن قاراجات ارنايى مەملەكەتتىك قورعا اۋدارىلدى. ول ارقىلى قارجى مەملەكەتتىك قاجەتتىلىكتەرگە جۇمسالادى.

ەسكە سالساق, بۇعان دەيىن سىبايلاس جەمقورلىققا قارسى قىزمەت قايرات ساتىبالدى ۇلىنىڭ 733 ميلليارد تەڭگەگە جۋىق مۇلكى قازاقستانعا قايتارىلعانىن مالىمدەدى. 2022 جىلدان باستاپ قازىرگى ۋاقىتقا دەيىن قايرات ساتىبالدى ۇلى جانە ونىمەن بايلانىستى تۇلعالاردان مەملەكەتكە زاڭسىز ساتىپ الىنعان 732,8 ميلليارد تەڭگە نەمەسە 1,6 ميلليارد دوللاردان استام سوماعا م ۇلىكتىك اكتيۆتەر مەن اقشالاي قاراجات قايتارىلدى. 2024 جىلدىڭ 16 تامىز كۇنى وسكەمەن قالاسىنىڭ №2 سوتى سوتتالعان قايرات ساتىبالدىنىڭ جازاسىنىڭ وتەلمەگەن بولىگىن جازانىڭ نەعۇرلىم جەڭىل تۇرىنە اۋىستىرۋ تۋرالى ءوتىنىشحاتىن قاناعاتتاندىرىپ باس بوستاندىعىنان ايىرۋ تۇرىندەگى جازانىڭ وتەلمەگەن بولىگىن 3 جىل 3 اي 7 كۇن مەرزىمگە باس بوستاندىعىن شەكتەۋگە اۋىستىردى.