جاڭالىقتار
«قايراتتىڭ» باس باپكەرى بەيادەپ ءسوز ايتقانى ءۇشىن جازالاندى
فوتو: fckairat.com
«قايرات» فۋتبول كلۋبى الەۋمەتتىك جەلىدە باس باپكەر رافاەل ءۋرازباحتيننىڭ 30 مامىردا وتكەن «اقتوبە» كومانداسىمەن ويىندا بەيادەپ ءسوز ايتقانى ءۇشىن كەشىرىم سۇراعان ۆيدەوۇندەۋىن جاريالادى, دەپ جازدى qandastar.kz
ۋرازباحتين «اقتوبەمەن» وتكەن ماتچ كەزىندەگى وقيعانىڭ قالاي بولعانىن ايتتى.
«ويىن بويى «اقتوبە» فك جانكۇيەرلەرى تريبۋنادان كوماندامىزدىڭ باپكەرلەر شتابى مەن ويىنشىلارىنا بىرنەشە رەت بالاعات ءسوز ايتىپ, ءبىز جاققا بوگدە زات لاقتىردى. جاعداي ۋشىعىپ, شيەلەنىستى ساتتە شامادان تىس ەموتسياعا بەرىلىپ, بەيادەپ ءسوز ايتىپ قويدىم. بۇل ارەكەتىم ءۇشىن شىن جۇرەكتەن وكىنەمىن. سوزىممەن رەنجىتىپ العان جانداردان كەشىرىم سۇرايمىن», — دەدى ول.
turkystan.kz حابارلاعانداي, پوليتسيا بۇل وقيعا ءۇشىن رافاەل ۋرازباحتين اكىمشىلىك جاۋاپكەرشىلىككە تارتىلىپ, ايىپپۇل سالىنعانىن حابارلادى.
«ول بالاعات ءسوز ايتىپ, قوعامدىق ءتارتىپتى بۇزعان. ازامات قۇقىقبۇزۋشىلىق جاساعانى ءۇشىن ەلوردا پوليتسيا دەپارتامەنتىنە جەتكىزىلىپ, اكىمشىلىك جاۋاپكەرشىلىككە تارتىلدى», — دەپ حابارلادى استانا پوليتسيا دەپارتامەنتىنىڭ ءباسپاسوز قىزمەتى.
