«قايراتتىڭ» باس باپكەرى كۇتپەگەن مالىمدەمە جاسادى

«قايرات» فۋتبول كلۋبىنىڭ باس باپكەرى رافاەل ورازباحتين چەمپيوندار ليگاسىنىڭ جالپى كەزەڭىنە وتكەننەن كەيىن كوماندانى كۇتىپ تۇرعان ەۋروپا فۋتبولىنىڭ الپاۋىتتارى تۋرالى ءوز ويىنشىلارىنا نە ايتقانىمەن ءبولىستى, دەپ حابارلايدى Qandastar.kz.

«چەمپيونات, كۋبوكتى جەڭىپ الۋ جانە چەمپيوندار ليگاسىنىڭ توپتىق كەزەڭىنە ءوتۋ دەگەن ماقسات بولدى . ءبىز ءبىر تاپسىرمانى ورىندادىق. چەمپيوندار ليگاسىنىڭ توپتىق كەزەڭى دەپ ويلاماعان شىعارمىز. ءبىز ەڭ قۇرىعاندا كونفەرەنتسيا ليگاسىندا ويناعىمىز كەلەدى دەپ ويلادىق. ەندى مىنا جەڭىستەن كەيىن مەن جىگىتتەرگە ومىردە ءبارى مۇمكىن, تەك سەنۋ كەرەك ەكەنىن تاعى ايتتىم. ءبىز ول جاققا جولداما العانىمىزعا ءالى دە سەنە المايمىز», — دەدى ورازباحتين.

سونداي-اق الماتىلىق كوماندانىڭ باس باپكەرى چەمپيوندار ليگاسىنىڭ جالپى كەزەڭىندە قانداي قارسىلاستى قالايتىنىن دا ايتتى.

«مەن بۇل تۋرالى ارمانداعان دا ەمەسپىن. بىراق ويىن الدىندا ءبىز جىگىتتەرگە جالپى توپتا ءبىزدى كۇتىپ تۇرعان كوماندالاردى كورسەتتىك. ول جەردە تەك ءىرى كلۋبتار بولدى. جىگىتتەرگە كورسەتىپ, ول ءتىزىمدى باسىپ شىعارىپ, كيىم اۋىستىراتىن بولمەگە ءىلىپ قويدىق. جىگىتتەر كورىپ, موتيۆاتسيا السىن دەدىم. ارينە, ءبىز چەمپيوندار ليگاسىنىڭ توپتىق كەزەڭىندە ەڭ اتاقتى كلۋبتارمەن كەزدەسكىمىز كەلەدى. ويتكەنى بۇل ومىردە ءبىر رەت بولاتىن شىعار. ءارى دەسە, بىزدە گلازگوداعىداي ستاديون بولسا, ءتىپتى تاماشا», — دەدى ورازباحتين.

ول چەمپيوناتتىڭ دەڭگەيى جوعارى بولسا, سايكەسىنشە بارلىق قۇرامداس بولىكتەر دە جاقساراتىنىن ايتتى. سونىمەن قاتار, باس باپكەر الماتىداعى ستاديون الاڭىنا, انىعىراق ايتقاندا, گازوننىڭ كۇيىنە كوڭىلى تولمايتىنىن جەتكىزدى.

«الاڭ ساپاسى ناشار دەپ ايتۋعا بولادى. ەگەر ماۋسىمنىڭ باسىندا الاڭ قازاقستانداعى ەڭ مىقتىلاردىڭ ءبىرى بولسا, قازىر شىنىمدى ايتسام, ولاي ايتا المايمىن. ءيا, بالكىم, بۇل جەڭىستە الاڭ بىزگە قانداي دا ءبىر جولمەن كومەكتەسكەن شىعار, ويتكەنى ەگەر الاڭ گلازگوداعىداي ساپادا بولسا, دوپ وتە جىلدام قوزعالادى, وندا بىزگە قيىنىراق بولار ەدى», — دەگەن ول سەلتيك دوپتى باقىلاۋدى, جىلدام پاس ويناۋدى ۇناتاتىن كوماندا ەكەنىن ەسكە سالدى.

ورازباحتين الاڭ ساپاسىنا دجەننيفەر لوپەستىڭ كونتسەرتى اسەر ەتكەن بولۋى مۇمكىن ەكەنىن استىرتىن جەتكىزدى.

«مۇمكىن وسىندا وتكەن كونتسەرت ءبىراز اسەر ەتكەن شىعار. مەن اگرونوممەن سويلەستىم, ول الاڭنىڭ ون جىلدان بەرى تۇرعانىن ايتتى. ونى جاقىندا قيىپ, قايتادان توسەۋ كەرەك. وكىنىشكە قاراي, بۇعان دەيىن مۇنداي مۇمكىندىگى بولمادى. ەندى ءۇش اپتالىق ءۇزىلىس بولادى, ول ءبىر امالىن تابۋعا تالپىنىپ كورەدى. بىراق ءشوپتىڭ شىعۋى ءۇشىن ۋاقىت قاجەت», — دەدى باس باپكەر.

ول دەگەنمەن الاڭداردىڭ ساپاسىنا نازار اۋدارۋ كەرەك, ويتكەنى قازاقستانداعى الاڭداردىڭ ساپاسى تومەن ەكەنىن مالىمدەدى.

«ەگەر ءبىز ەۋروكۋبوكتاردا جاقسى دەڭگەيدە ويناعىمىز كەلسە, ستاديوندى دا, الاڭداردى دا جاقسارتۋىمىز كەرەك. بۇل عانا ەمەس, بىزگە كوپ ءىس اتقارۋ كەرەك. بۇل جۇيەلى جۇمىس, مەملەكەتتىك دەڭگەيدە بولۋى كەرەك. ءبىز گلازگودا بولدىق. وندا 50-60 مىڭ ورىنعا ارنالعان ستاديون بار. ولاردا اپتا سايىن, ءتىپتى اپتاسىنا ەكى رەت ماتچتار وتەدى. ادامدار ءۇشىن بۇل قانداي مەرەكە! نەگە ءبىز مۇنى ىستەي المايمىز? نەگە ءبىز ناشار الاڭداردا ويناۋىمىز كەرەك? مەن ءبىزدىڭ باسشىلاردىڭ قايدا قاراپ وتىرعانىن بىلمەيمىن. بالكىم, ءبىزدىڭ جەتىستىگىمىز مەملەكەت فۋتبولعا, ستاديوندار مەن الاڭداردى دامىتۋعا كوڭىل بولۋىنە قوسىمشا سەرپىن بەرەر. سولاي دەپ ۇمىتتەنەمىز», — دەدى ورازباحتين.

ەسكە سالايىق, 26 تامىزدا الماتىلىق «قايرات» چەمپيوندار ليگاسىنىڭ پلەي-وفف كەزەڭىندەگى ماتچتا شوتلانديالىق «سەلتيكتى» پەنالتيلەر سەرياسىندا جەڭىپ, تاريحتا تۇڭعىش رەت ەۋروپاداعى ەڭ بەدەلدى كلۋبتىق ءتۋرنيردىڭ توپتىق كەزەڭىنە جولداما الدى.