جاڭالىقتار
«قالا قۇردىمعا كەتتى»: دوساەۆ وتستاۆكاسىن تالاپ ەتىپ ميتينگ وتكىزبەك بولعان بەلسەندىلەرگە رۇقسات بەرمەي قويدى
فوتو: primeminister.kz
قوعام بەلسەندىسى سانجار بوقاەۆ پەن زاڭگەر مۇرات ادام الماتى اكىمى ەربولات دوساەۆتى وتستاۆكاعا جىبەرۋ ءۇشىن ميتينگ ۇيىمداستىرماق بولعان, بىراق اكىمدىك رۇقسات بەرمەدى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
سانجار بوقاەۆ پەن مۇرات ادام الماتى اكىمدىگىنە «الماتى قالاسىنىڭ اكىمى ەربولات دوساەۆتىڭ وتستاۆكاعا كەتۋىن تالاپ ەتەمىز» دەگەن تاقىرىپتا ميتينگ وتكىزۋ تۋرالى حابارلاما تاپسىرعان.
ولاردىڭ ايتۋىنشا, دوساەۆ باسقارىپ وتىرعان تۇستا قالا قۇردىمعا كەتتى. جاڭا بورديۋرلەردى قايتادان جاڭاسىنا اۋىستىرۋ جالعاسۋدا. ال نۇكتەلى جانە تىعىز قۇرىلىس بۇرىنعىدان دا قارقىندى ءجۇرىپ جاتىر. ونىمەن قوسا, اعاشتاردى كەسۋ توقتار ەمەس. “اۆتوبۋستار زيراتى» پايدا بولىپ, جەمقورلىق دەڭگەيى ءوستى. ال جاڭا مەترو ستانتسيالارىنىڭ قۇرىلىسى ىستەن شىعۋ قاۋپىندە تۇر.
«بارلىق سالادا جۇيەلىك قاتەلەر, سىبايلاس جەمقورلىق قاۋپىنىڭ جوعارى دەڭگەيى جانە ءتيىمسىز باسقارۋ بايقالادى. بۇل — رەۆيزيالىق تەكسەرۋلەردىڭ ناتيجەلەرىمەن راستالعان ماسەلەلەردىڭ تولىق ءتىزىمى ەمەس. ءبىز, الماتىلىقتار, قالامىزدىڭ جويىلىپ, تونالىپ جاتقانىن ءۇنسىز قاراپ وتىرا المايمىز. سونىمەن قاتار, باق پەن قوعامنىڭ نازارىن مىناعان اۋدارعىمىز كەلەدى: «الماتى اكىمى وتستاۆكاسى» تاقىرىبىنداعى ميتينگىنى كەلىسۋ ماسەلەسىن سول اكىمنىڭ ءوزى قارايدى, بۇل – مۇددەلەر قاقتىعىسى», – دەدى ميتينگ ۇيىمداستىرماق بولعان بەلسەندىلەر.
دەگەنمەن اكىمدىك قوعام بەلسەندىلەرىنە بۇل ميتينگتى وتكىزۋگە رۇقسات بەرمەدى. بۇل تۋرالى مۇرات ادام حابارلادى. بەلسەندىنىڭ ايتۋىنشا, ولار ميتينگتى 2025 جىلدىڭ 24 مامىرى كۇنى ساعات 10:00-دەن 18:00-گە دەيىن امانگەلدى يمانوۆ اتىنداعى سكۆەردە وتكىزۋگە ءوتىنىش بەرگەن. بىراق اكىمدىك ميتينگ وتكىزۋگە تەك ساعات 12:00-دەن 15:00 ارالىعىندا عانا تىيىم سالعان.
ونىڭ سوزىنشە, زاڭ بويىنشا, ەگەر سۇرالعان ورىن بوس بولماسا, جەرگىلىكتى اتقارۋشى ورگان باسقا نۇسقا ۇسىنۋى ءتيىس. بىراق دوساەۆتىڭ اتى اتالعان كەز كەلگەن شارادا, قالاداعى بارلىق ورىنداردىڭ «بوس ەمەس» بولىپ شىعاتىنىن اتاپ ءوتتى.
“بۇل جولى دا اكىمدىك زاڭ تالاپتارىن ورەسكەل بۇزدى. اكىمدىك قىزمەتكەرلەرى ميتينگتى جىلدام كەرى قايتارۋعا اسىعىپ, اكىمشىلىك راسىمدىك-پروتسەستىك كودەكستى (ارپك) ەسكەرۋسىز قالدىردى. ولار ءبىزدىڭ ءوتىنىش بويىنشا الدىن الا تىڭداۋ وتكىزۋدى مۇلدە ۇمىتىپ كەتكەن. بۇل اكىمدىكتىڭ قانشالىقتى مازاسىزدانىپ وتىرعانىن كورسەتەدى. قولدارىنان كەلسە بولدى, باستىسى — ميتينگكە رۇقسات بەرمەۋ, — دەدى مۇرات ادام.
بەلسەندىلەر ەندى سوتقا جۇگىنبەك. ولار وزدەرىنىڭ قۇقىعىن قورعاپ, اكىم ەربولات دوساەۆتىڭ ارەكەتىن زاڭسىز دەپ تانۋدى تالاپ ەتەتىندەرىن ايتتى.
ايتا كەتەيىك, ەربولات دوساەۆ الماتى اكىمى قىزمەتىن 2022 جىلدىڭ قاڭتارىنان بەرى اتقارىپ كەلەدى. وسى ۋاقىت ىشىندە قالا باسشىسى بىرنەشە رەت سىنعا ۇشىراعان ەدى.
ەسكە سالايىق, بۇعان دەيىن الماتى اكىمى دوساەۆتىڭ ەندى پرەزيدەنتكە ەكى اپتا سايىن ەسەپ بەرىپ وتىراتىنىحابارلانعان ەدى.
