Jańalyqtar
«Qalany bókken sary tútin». О́skemendegi tıtan-magnıı kombınatyna 24 mln teńge aıyppul salyndy
Foto: Kıra Moroz
Eleýli ekologııalyq buzýshylyqtar tirkelgen «О́skemen tıtan-magnıı kombınaty» JShS (О́K TMK) ónerkásiptik kásipornynda ekologtar júrgizgen tekserý aıaqtaldy. Onyń qorytyndysy boıynsha kásiporynǵa 24 mıllıon teńge aıyppul salyndy, dep habarlaıdy qandastar.kz Zakon.kz-ke silteme jasap.
2025 jyldyń 19 mamyrynda bolǵan oqıǵadan keıin kásiporynnyń ekologııalyq daýǵa basy ilikti. Ol kezde О́skemen turǵyndary sary tumanǵa oranyp, hlordyń ótkir ıisine tap bolǵan. Saldarynan qala turǵyndarynyń kóbisi bas aınalý men jalpy aýrýǵa shaǵymdanyp, dárigerge júgingen.
О́ńirlik kommýnıkaııalar qyzmeti О́K TMK basshylyǵyna silteme jasaı otyryp, shtattan tys jaǵdaılar bolmaǵanyn habarlady. Resmı nusqa boıynsha, kásiporynda hlorlaý qondyrǵysynyń kondensaııa júıesine jospardan tys tazartý jumystary júrgizilgen.
Alaıda, oqıǵa ornynda aýany zerttegen ekologtar ruqsat etilgen shekten tys hlordyń mólsherin tirkedi. Sol kezde kásiporynda tekserý júrgiziletini habarlanǵan. 5 maýsymda bul tekserýdiń nátıjeleri belgili boldy.
«20 mamyrdan 2 maýsym aralyǵynda júrgizilgen jospardan tys tekserý gaz tazartý jabdyqtaryn durys paıdalanbaýdy qosa alǵanda, óreskel buzýshylyqtardy anyqtady. Gaz qubyryn profılaktıkalyq tazartý kezinde hlorlaý qondyrǵysynda qysymnyń qysqa merzimdi joǵarylaýy oryn aldy, bul lastaýshy zattardyń tazartý júıesin aınalyp ótip, atmosferaǵa shyǵýyna túrtki boldy. Bul jaıt shamamen eki saǵatqa sozyldy, muny tergeýge qatysqan ShQO TJD mamandary da rastady», — dedi ShQO Ekologııa departamenti.
Sondaı-aq, ekologtar synama alý oryndaryndaǵy sáıkessizdikterdi tirkedi, bul mamandardyń aıtýynsha, ekologııalyq monıtorıng erejeleriniń buzylýyn jáne naqty shyǵaryndylar týraly derekterdiń yqtımal burmalana kórsetilýin tanytýy múmkin.
«Tekserý nátıjeleri boıynsha kásiporynǵa salynǵan aıyppuldyń jalpy somasy shamamen 24 mln teńgeni qurady, sondaı-aq anyqtalǵan buzýshylyqtardy joıýǵa nusqama berildi, bolashaqta mundaı jaǵdaılarǵa jol bermeý úshin arnaıy sharalar ázirlep, qabyldaý usynyldy», dep habarlady vedomstvonyń baspasóz qyzmeti.
Eger nusqama belgilengen merzimde oryndalmasa, departamenttegiler qaıta tekserý júrgiziletinin naqtylady.
Buǵan deıin О́skemende aýadan hlordyń shamadan tys mólsheri anyqtalyp, tekseris bastalǵanyn jazǵanbyz.
