Kamera joq jerde, aıaǵyn baılap, amınazın berdi: Túrkistandaǵy psıhıkalyq aýrýhanada kishkentaı qyz júkti bolyp qalǵan

Foto: ashyq derekkóz

Túrkistan oblystyq psıhıkalyq aýytqýy bar jandardy emdeıtin aýrýhanada bylyq shyqty, dep habarlaıdy qandastar.kz Informbıýroǵa silteme jasap.

Emdeý mekemesinde sanıtar mamandar naýqastardyń jaǵdaıyn paıdalanyp, aram oıyn iske asyrdy deıdi shaǵymdanýshylar. Tipti, kámelet jasyna tolmaǵan 17 jastaǵy boıjetken júkti bolyp, túsik jasatty dep otyr. Jábirlenýshilerdiń týystarynyń aıtýynsha polıııa tergeýdi saǵyzsha sozyp, kúdiktilerdi de áli ustamaǵan.

Bet-júzin kórsetpeı, aty-jónin atamaýdy ótingen kelinshek Túrkistan oblystyq psıhıkalyq densaýlyq ortalyǵynda bolǵan sumdyq jaıtty aıtyp berdi. Sózinshe, shızofrenııa dıagnozymen emdelip jatqan 17 jastaǵy qyzyn mekeme qyzmetkerleri zorlaǵan. Bul jaǵa ustatar oqıǵany boıjetkenniń qursaǵyna sábı bitkende biraq bildim deıdi anasy.

“Ýzıge apardym. Sol kezde 10 apta 4 kún dep berdi. Bir emes eki ýzıge túsirdik. Qyzym aıtty tergeýde. Temir tósekke, teledıdar bólmesinde, kamerasy joq jerde aıaq-qolyn temir tósekke baılap, tartyp, uıyqtatatyn amınazın degen ýkoldy salyp turyp, eki sanıtar istegen eken. Kamerasy joq jerde baspaldaqta istegen eken. Taǵy cherdakqa shyǵaryp istegen eken”, – deıdi jábirlenýshiniń anasy.

Osy ortalyqta emdelip jatqan 21 jastaǵy taǵy bir qyz qorlandym dep jaqyndarynan kómek suraǵan eken. Anasy birden polıııa shaqyrtyp, aryz jazǵanyn aıtady. Saraptama taǵaıyndalǵan. Biraq tártip saqshylar úsh aıdan beri tergeýdi júrgizbeı, qol qýsyryp otyr deıdi jábirlenýshiniń týystary.

“Osy eki sanıtardyń ústinen aryzdanǵanbyz. Qylmystyq is qozǵalyp, eshqandaı áreket istep jatqan joq. Men barmaǵan jerim qalmady. Jazýyndaı jazyp jatyrmyn. Kamerany da bizge kórsetpedi ǵoı. Odan keıin amal joq advokat jaldadym. Advokatpen baryp, kamerany aldyq. Biraq ony kórýge maǵan múmkindik bermedi. Múmkin arasynda ózderi tazalap óshirip tastaǵan shyǵar. Ne tergeýshi kórsetpeıdi”, – deıdi jábirlenýshiniń anasy.

Júıke júıesinde aqaýy bar naýqastar jatatyn ortalyqtyń basshylyǵy suhbat berýden bas tartty. Al, polıııa «zorlaý» babymen qylmystyq is qozǵalyp, tergeý júrgizilip jatqanyn jetkizdi. Biraq saraptama qorytyndysy áli shyqpapty.

“Atalǵan is boıynsha qylmystyq is qozǵaldy. Tıisti saraptamalar ótkizilýde. Nátıjesi boıynsha proessýaldy sheshim qabyldanatyn bolady”, – deıdi Shymkent qalasy ál-farabı aýdany polıııa basqarmasynyń bastyǵy Batyr Myrzageldıev.

Jyndyhanada zorlandym degen eki naýqas ta qazir úıinde. Kámelet jasyna tolmaı júkti bolǵan qyzym jasandy túsik jasatty deıdi anasy. Al naýqastardyń jaqyndary endi balalarymyzdy psıhıkalyq densaýlyq ortalyǵyna jibermeımiz dep otyr. Olar kinálilerdiń tıisti jazasyn alǵanyn qalaıdy.