«Qandaı adamsyń, klýbty ber». Sottalǵan sheneýniktiń burynǵy áıeli taǵy bir jaıtty jaıyp saldy

Foto: Tengrinews.kz

Sottalǵan Qýandyq Bıshimbaevtyń burynǵy áıeli Nazym Qaharman tikeleı efırde áıelderge ajyrasqannan soń ne isteý kerektigi týraly keńes berdi, dep habarlaıdy «Adyrna» ulttyq portaly.

Belsendi Nazym QaHarman men marqum Saltanat Núkenovanyń aǵasy Aıtbek Amangeldi 17 shilde kúni áleýmettik jelide tikeleı efır ótkizdi. Talqylanǵan taqyryp – ajyrasqaly júrgen kelinshekterge ózin, balalaryn qorǵaýǵa kómekteser túrli keńester.

Nazym Qaharman áıelderdiń kúndelikti kóretin qıyndyqtaryn aıtty.

«Ajyrasqan ýaqytta dúnıe-múliktiń teńdeı bólinýi – zańdylyq, bul álemdik tájirıbe. Alaıda bizdiń el buǵan áli jatyrqaı qaraıdy. Erkekter «Men tabys tabamyn, al sen úıde bos otyrsyń» dep shyǵa keledi. Áıeldiń 9 aı bala kótergeni, bosanǵany, gormondyq, psıhologııalyq qıyndyqtardy bastan ótkizgeni qaıda qaldy? Onyń quny qalaı esepteledi? Balanyń ákege syılar baqytyn da aqshamen esepteı almaımyz. Biraq álemdik tájirıbede er men áıeldiń otbasyndaǵy materıaldyq úlesinen bólek materıaldyq emes úlesi de esepke alynady. Bizge de osyndaı kózqaras kerek. Qazaq qoǵamynda áıelge qoıylar talap tym kóp. Ol keremet jar, ıbaly kelin, úlgili ana bolyp qana qoımaı, jetinshi balasyn bosanǵan soń 40 kúnnen keıin model sııaqty symbatty bolýy qajet. Sol talaptardyń bárine saı kelip turǵan kúnde de úıde bos otyrsyń dep eńbegin qunsyzdandyrady», – deıdi Nazym.

Nazym Qaharman Qýandyq Bıshimbaevpen ajyrasqan sátte kúıeýiniń manıpýlıaııasy týraly da jasyrmady.

«Múlik arqyly da manıpýlıaııa jasaýǵa bolady. Men de ózge áıelder sekildi kúıeýime sendim. Klýb meniń burynǵy eneme (Bıshimbaevtyń anasyna) tirkelgen. Biz ajyrasyp jatqanda «Qandaı adamsyń, klýbty ber» degen sekildi kórinis boldy. Bul da bir manıpýlıaııa. Janjalǵa mán bermeı óz jumysyńdy isteı berý kerek», – deıdi ol.

Úsh balanyń anasy Nazym óz kásibin bastap, aıaqqa turǵyzý úshin 10 jyl ýaqytyn sarp etken. Alaıda kásip Bıshimbaevtyń anasyna jazylyp ketken kórinedi. Artynsha eks-mınıstr burynǵy áıeline aktıvterin qaıtarǵan.