جاڭالىقتار
«قارا بۇركىتتەگى» تۇتقىنداردى كۇزەتىپ جۇرگەن اسكەريلەر جۇيەلى تۇردە پارا الىپ وتىردى دەگەن كۇدىككە ءىلىندى
فوتو: قر ءىىم قاج ءباسپاسوز قىزمەتى
جىتىقاراداعى اسكەري بولىمگە قاراستى 2-جەكە اتقىشتار روتاسىنىڭ ۆزۆود كومانديرلەرى مەدەت قوجاحمەتوۆ پەن بولات قاراعوزين قاراماعىنداعىلاردان جۇيەلى تۇردە پارا الدى دەگەن كۇدىككە ىلىنگەن. ولار ءومىر بويىنا باس بوستاندىعىنان ايىرىلعاندار وتىرعان «قارا بۇركىت» كولونياسىندا قاراۋىل بولىپ جۇمىس ىستەگەن, دەپ جازدى qandastar.kz
اقشا اۋدارىمدارىنىڭ جالپى سوماسى 2 ملن تەڭگەدەن اسادى. بۇل تۋرالى Stan.kz اقپارات اگەنتتىگى “ناشا گازەتا” باسىلىمىنا سىلتەمە جاساپ حابارلايدى.
تەرگەۋ سوتىنىڭ قاۋلىسى قۇقىق قورعاۋشى نيكولوي گينياتوۆتىڭ نازارىن اۋدارعان. اسكەريلەرگە قاتىستى تەرگەۋ ءالى اياقتالعان جوق. وندا سىبايلاس جەمقورلىق فاكتىلەرى قۇپيا دەرەككوزدەن الىنعان اقپارات پەن جەدەل-ىزدەستىرۋ شارالارىنىڭ ارقاسىندا بەلگىلى بولعانى ايتىلعان. تەرگەۋ نۇسقاسى بويىنشا, قوجاحمەتوۆ پەن قاراعوزين قاراماعىنداعى قىزمەتكەرلەردەن كولونياداعى جاۋىنگەرلىك كەزەكشىلىك اۋىسىمىندا بولماعانى ءۇشىن 5 مىڭنان 10 مىڭ تەڭگەگە دەيىن اقشالاي سىياقى العان.
“الىنعان مالىمەتتەردى تەكسەرۋ بارىسىندا جاۋىنگەرلىك مىندەتتەرىن ورىنداۋدان جالتارعان اسكەري كەلىسىمشارت بويىنشا قىزمەت اتقاراتىن اسكەري قىزمەتشىلەر 2-اتقىشتار روتاسى بولىمشەلەرىنىڭ باستىقتارى الەكساندر ابراروۆقا, جاركەن بورلىباەۆقا, ءمادي مۇحتاروۆقا, المات يسپانوۆقا نەمەسە تىكەلەي قوجاحمەتوۆ پەن قاراعوزينگە بانك قوسىمشالارى ارقىلى نەمەسە قولما-قول اقشا اۋدارىپ جۇرگەنى انىقتالدى. بۇل رەتتە قوجاحمەتوۆ پەن قاراعوزين تاۋلىكتىك كەزەكشىلىك پاراقتارىنا جانە تاۋلىكتىك ۇلەستىڭ بەرىلۋى تۋرالى باياناتتارعا جازبالاردى وشەتىن قالاممەن جازعان. كەيىن ولار بەلگىلەۋ جانە نۇسقاۋلىق جۇرگىزۋ ءۇشىن ساۋالناماداعى دەرەكتەردى ەسكى اۋىسىمداعى اسكەريلەردىڭ دەرەكتەرىنە اۋىستىرعان. ەسكى اۋىسىمداعى اسكەري قىزمەتشىلەر قول قويىپ, ارنايى قۇرالدار (كىسەن, بروندالعان كەۋدەشە رەزىڭكە تاياق, اەروزول باللوندار جانە بەينەتىركەۋىش) الماستان اۋماقتان شىعىپ كەتكەن”, –دەلىنگەن قاۋلىدا.
قۇجاتقا سايكەس, تەرگەۋ كەزىندە 2024 جىلدىڭ تامىزىندا 30 اسكەري قىزمەتشىنىڭ كۇندەلىكتى تاۋلىكتىك كەزەكشىلىكتەن جالتارعانى, ال 8-ءى جۇمىسقا مۇلدە كەلمەگەنى انىقتالعان.
«ورتالىق» وڭىرلىك قولباسشىلىعى — 6800 اسكەري ءبولىمى» رەسپۋبليكالىق مەملەكەتتىك مەكەمەسى قولباسشىسى ساكەنتاي شەكاربەكوۆ باسىلىمنىڭ جازباشا سۇراۋىنا ىشكى ىستەر مينيسترلىگىنىڭ اسكەري تەرگەۋ باسقارماسى بۇل ءىس بويىنشا تەرگەۋ جۇرگىزىپ جاتقانىن راستاعان. بىراق بۇل تەرگەۋگە قاتىستى ەشقانداي پىكىر بىلدىرمەگەن. سونداي-اق قوجاحمەتوۆ پەن قاراعوزيننىڭ لاۋازىمى مەن ەڭبەكاقىسى جونىندە, تەرگەۋ باستالعاننان كەيىن قابىلدانعان شارالار تۋراسىندا دا ءتىس جارماعان.
قاج دەپارتامەنتى باستىعىنىڭ ورىنباسارى احمەت شۇلەنوۆ ۆەدومستۆونىڭ قۇزىرەتىنە “ۆەدومستۆولىق باعىنىستى مەكەمەلەردىڭ قىزمەتكەرلەرى بولىپ سانالمايتىن تۇلعالارعا قاتىستى ءىس جۇرگىزۋ” دەپارتامەنتتىڭ قۇزىرەتىنە جاتپايتىنىن ايتتى.
كەزدەيسوق پا, جوق پا, بىراق 11 اقپاندا قاجد سايتىندا «№39 مەكەمە» رمۋ-عا («قارا بۇركىت» كولونياسى – رەد.) باسشىنىڭ رەجيم جانە جەدەل جۇمىس جونىندەگى جاڭا ورىنباسارى مەن جالپى ماسەلەلەر جانە ەڭبەكتى ۇيىمداستىرۋ جونىندەگى ورىنباسارى تاعايىندالعانى جونىندە اقپارات جاريالاندى.
1 ساۋىردە قۇقىق قورعاۋشى نيكولاي گينياتوۆ قوستاناي وبلىسىنىڭ قۇقىق قورعاۋ ورتالىعىنىڭ پاراقشاسىندا وعان قاتىستى قىلمىس بەلگىلەرى تابىلعانى – اسكەري تەرگەۋ دەرەكتەرىن الدىن الا جاريالاۋعا قاتىستى حاتتاما تولتىرىلعانىن حابارلادى.
“ەرەكشە مارتەبەگە يە مەكەمەدە اشىق سىبايلاس جەمقورلىق سحەماسىنىڭ بار ەكەندىگى تۋرالى وقيعانىڭ جاريالانۋى فاكتىسىنە الاڭداعان جاۋىنگەرلەر اسكەري پروكۋرورعا جۇگىندى – مۇنداي سوراقى دۇنيەلەردى قاتارداعى ادامنىڭ جانە ولاردىڭ رۇقساتىنسىز جاريالاعانى قالاي?”, – دەپ جازىلعان ورتالىق پاراقشاسىنداعى جازبادا.
13 ساۋىردە گينياتوۆ اسكەري پروكۋروردىڭ حاتتاماسى قاراۋسىز قالعانىن مالىمدەدى.
