«Qara búrkittegi» tutqyndardy kúzetip júrgen áskerıler júıeli túrde para alyp otyrdy degen kúdikke ilindi

Foto: QR IIM QAJ baspasóz qyzmeti

Jitiqaradaǵy áskerı bólimge qarasty 2-jeke atqyshtar rotasynyń vzvod komandırleri Medet Qojahmetov pen Bolat Qaraǵozın qaramaǵyndaǵylardan júıeli túrde para aldy degen kúdikke ilingen. Olar ómir boıyna bas bostandyǵynan aıyrylǵandar otyrǵan «Qara búrkit» kolonııasynda qaraýyl bolyp jumys istegen, dep jazdy qandastar.kz

Aqsha aýdarymdarynyń jalpy somasy 2 mln teńgeden asady. Bul týraly Stan.kz aqparat agenttigi “Nasha gazeta” basylymyna silteme jasap habarlaıdy.

Tergeý sotynyń qaýlysy quqyq qorǵaýshy Nıkoloı Gınıatovtiń nazaryn aýdarǵan. Áskerılerge qatysty tergeý áli aıaqtalǵan joq. Onda sybaılas jemqorlyq faktileri qupııa derekkózden alynǵan aqparat pen jedel-izdestirý sharalarynyń arqasynda belgili bolǵany aıtylǵan. Tergeý nusqasy boıynsha, Qojahmetov pen Qaraǵozın qaramaǵyndaǵy qyzmetkerlerden kolonııadaǵy jaýyngerlik kezekshilik aýysymynda bolmaǵany úshin 5 myńnan 10 myń teńgege deıin aqshalaı syıaqy alǵan.

“Alynǵan málimetterdi tekserý barysynda jaýyngerlik mindetterin oryndaýdan jaltarǵan áskerı kelisimshart boıynsha qyzmet atqaratyn áskerı qyzmetshiler 2-atqyshtar rotasy bólimsheleriniń bastyqtary Aleksandr Abrarovqa, Járken Bórlibaevqa, Mádı Muhtarovqa, Almat Ispanovqa nemese tikeleı Qojahmetov pen Qaraǵozınge bank qosymshalary arqyly nemese qolma-qol aqsha aýdaryp júrgeni anyqtaldy. Bul rette Qojahmetov pen Qaraǵozın táýliktik kezekshilik paraqtaryna jáne táýliktik úlestiń berilýi týraly baıanattarǵa jazbalardy óshetin qalammen jazǵan. Keıin olar belgileý jáne nusqaýlyq júrgizý úshin saýalnamadaǵy derekterdi eski aýysymdaǵy áskerılerdiń derekterine aýystyrǵan. Eski aýysymdaǵy áskerı qyzmetshiler qol qoıyp, arnaıy quraldar (kisen, brondalǵan keýdeshe rezińke taıaq, aerozol ballondar jáne beınetirkeýish) almastan aýmaqtan shyǵyp ketken”, –delingen qaýlyda.

Qujatqa sáıkes, tergeý kezinde 2024 jyldyń tamyzynda 30 áskerı qyzmetshiniń kúndelikti táýliktik kezekshilikten jaltarǵany, al 8-i jumysqa múlde kelmegeni anyqtalǵan.

«Ortalyq» óńirlik qolbasshylyǵy — 6800 áskerı bólimi» respýblıkalyq memlekettik mekemesi qolbasshysy Sakentaı Shekarbekov basylymnyń jazbasha suraýyna Ishki ister mınıstrliginiń áskerı tergeý basqarmasy bul is boıynsha tergeý júrgizip jatqanyn rastaǵan. Biraq bul tergeýge qatysty eshqandaı pikir bildirmegen. Sondaı-aq Qojahmetov pen Qaraǵozınniń laýazymy men eńbekaqysy jóninde, tergeý bastalǵannan keıin qabyldanǵan sharalar týrasynda da tis jarmaǵan.

QAJ departamenti bastyǵynyń orynbasary Ahmet Shúlenov vedomstvonyń quzyretine “vedomstvolyq baǵynysty mekemelerdiń qyzmetkerleri bolyp sanalmaıtyn tulǵalarǵa qatysty is júrgizý” departamenttiń quzyretine jatpaıtynyn aıtty.

Kezdeısoq pa, joq pa, biraq 11 aqpanda QAJD saıtynda «№39 mekeme» RMÝ-ǵa («Qara búrkit» kolonııasy – red.) basshynyń rejım jáne jedel jumys jónindegi jańa orynbasary men jalpy máseleler jáne eńbekti uıymdastyrý jónindegi orynbasary taǵaıyndalǵany jóninde aqparat jarııalandy.

1 sáýirde quqyq qorǵaýshy Nıkolaı Gınıatov Qostanaı oblysynyń quqyq qorǵaý ortalyǵynyń paraqshasynda oǵan qatysty qylmys belgileri tabylǵany – áskerı tergeý derekterin aldyn ala jarııalaýǵa qatysty hattama toltyrylǵanyn habarlady.

“Erekshe mártebege ıe mekemede ashyq sybaılas jemqorlyq shemasynyń bar ekendigi týraly oqıǵanyń jarııalanýy faktisine alańdaǵan jaýyngerler áskerı prokýrorǵa júgindi – mundaı soraqy dúnıelerdi qatardaǵy adamnyń jáne olardyń ruqsatynsyz jarııalaǵany qalaı?”, – dep jazylǵan ortalyq paraqshasyndaǵy jazbada.

13 sáýirde Gınıatov áskerı prokýrordyń hattamasy qaraýsyz qalǵanyn málimdedi.