قاراعاندىدا قوعامدىق كولىكتەگى جولاقى قىمباتتاۋى مۇمكىن

قاراعاندىدا قوعامدىق كولىكتەگى جولاقىنى كوتەرۋ ماسەلەسى قارالۋدا. بۇل سۇراق قازىرگى ۋاقىتتا تالقىلاۋ مەن پىسىقتاۋ كەزەڭىندە, دەپ حابارلايدى Qandastar.kz اقپارات پورتالى ekaraganda.kz-كە سىلتەمە جاساپ.

مامانداردىڭ ايتۋىنشا, ينفلياتسيا, جانارماي باعاسىنىڭ ءوسۋى, سونداي-اق جولاۋشىلار تاسىمالى ساپاسىن ساقتاۋ جانە جاقسارتۋ قاجەتتىلىگى — ءتاريفتىڭ وسۋىنە سەبەپ بولۋى مۇمكىن.

قاراعاندى قالاسىنىڭ تكش, جولاۋشىلار كولىگى جانە اۆتوموبيل جولدارى بولىمىنە قاراستى سەكتور مەڭگەرۋشىسى تەمىرلان تالدىباەۆتىڭ ايتۋىنشا, قازىرگى ەسەپتىك ورتاشا تاريف – 470 تەڭگە. الايدا مەملەكەتتىك سۋبسيديالارعا قاراماستان, بۇل قارجى جانارماي شىعىندارى مەن جۇرگىزۋشىلەر مەن تەحنيكالىق قىزمەتكەرلەردىڭ جالاقىسىن تولىق وتەۋگە جەتكىلىكسىز.

«ءبىز جىل سايىن جولاۋشىلار تاسىمالىنىڭ ساپاسىن ارتتىرۋعا كۇش سالىپ كەلەمىز: جاڭا باعىتتار اشامىز, بۇرىن جابىلعاندارىن قايتا ىسكە قوسامىز, اۆتوبۋستار سانىن كوبەيتەمىز. مۇنىڭ ءبارى قوسىمشا شىعىندى تالاپ ەتەدى. ونىڭ ۇستىنە, ساۋىردەن باستاپ جانارماي باعاسى قىمباتتادى. مۇنىڭ ءبارىن ەسكەرمەۋگە بولمايدى», – دەدى تەمىرلان تالدىباەۆ.

دەگەنمەن, جولاقىنى كوتەرۋ – ۇزاق ءارى كوپساتىلى پروتسەسس. ەڭ الدىمەن, جوبانى قالالىق قوعامدىق كەڭەستە قورعاۋ قاجەت, ودان كەيىن ول قالالىق ءماسليحات جانىنداعى بىرلەسكەن كوميسسيانىڭ قاراۋىنا جىبەرىلەدى. سوڭعى شەشىم ءماسليحات سەسسياسىندا قابىلدانادى, وندا جوبا نەگىزدەلىپ, دەپۋتاتتاردىڭ قولداۋىن الۋى ءتيىس. تەك وسىدان كەيىن نورماتيۆتىك-قۇقىقتىق اكت قابىلدانىپ, «ادىلەت» مەملەكەتتىك جۇيەسىندە جاريالانادى, جانە تۇرعىندارعا ءتاريفتىڭ وزگەرگەنى تۋرالى رەسمي تۇردە حابارلانادى.

الدىن الا مالىمەت بويىنشا, ONAY! كارتاسى ارقىلى تولەم جاساعان كەزدە جولاقى 120 تەڭگەگە دەيىن, ال قولما-قول تولەگەن جاعدايدا 250 تەڭگەگە دەيىن كوتەرىلۋى مۇمكىن. بۇل قاراعاندىداعى تاريفتەردى الماتى قالاسىنداعى باعالارمەن شامالاس دەڭگەيگە جەتكىزەدى.

ەسكە سالا كەتەيىك, قاراعاندىدا جولاقى سوڭعى رەت 2024 جىلدىڭ ماۋسىمىندا كوتەرىلگەن بولاتىن. بۇعان دەيىن قالادا 10 جىلدان استام ۋاقىت بويى جولاقى وزگەرمەگەن ەدى.

قالاي بولعاندا دا, بۇل ماسەلە ازىرگە اشىق كۇيىندە قالىپ وتىر, جانە سوڭعى شەشىم بارلىق قاجەتتى راسىمدەر اياقتالعاننان كەيىن عانا قابىلدانادى.