جاڭالىقتار
قاراعاندىدا جاڭا تۋعان سابيلەرگە دومبىرا سىيعا تارتىلدى

قاراعاندىدا دومبىرا كۇنى تۋعان بالالارعا قازاق مادەنيەتىنىڭ ماڭىزدى سيمۆولدارىنىڭ ءبىرى – مۋزىكالىق اسپاپ تارتۋ ەتۋ داستۇرگە اينالدى. بيىل ۇلتتىق مەرەكە استانا كۇنىمەن تۇسپا-تۇس كەلدى, دەپ حابارلايدى Qandastar.kz.
قازاقستان حالقى اسسامبلەياسىنىڭ مۇشەلەرى پەرزەنتحانالاردا بولىپ, انالار مەن سابيلەردى قۇتتىقتاپ, ەلىمىزدىڭ جاڭا ازاماتتارىنا باقىت تىلەدى.
دومبىرا – بۇل جاي عانا مۋزىكالىق اسپاپ ەمەس, ول قازاق مادەنيەتىنىڭ ءبىر بولىگى, داستۇرلەر مەن ۇلتتىق ماقتانىشتىڭ سيمۆولى. ول ۇرپاقتاردىڭ بايلانىسىن, حالىقتىڭ باي تاريحي مۇراسى مەن رۋحاني ساباقتاستىعىن بىلدىرەدى. سوندىقتان دا ءبىز وسىنداي سىيلىق تابىستادىق, – دەدى قاراعاندى وبلىسى قحا انالار كەڭەسىنىڭ ءتورايىمى ايجان قياسوۆا.
قاراعاندىداعى № 1 پەريناتالدىق ورتالىقتا وسى مەرەكە كۇنى ءبىرىنشى بولىپ ءبىر قىز دۇنيەگە كەلدى, نارەستەنىڭ ەسىمىن اميرا دەپ قويدى. ءسابي – وتباسىنداعى بەسىنشى بالا. سىيعا تارتىلعان دومبىرا ءسابيدىڭ تۇمارى ىسپەتتەس بولماق.
اكتسيا ۇلتارالىق كەلىسىمدى نىعايتۋعا جانە ۇلتتىق قۇندىلىقتاردى ىلگەرىلەتۋگە قىزمەت ەتەدى, دەپ سەنەدى باستاماشىلار.
وبلىس بويىنشا ەكى ماڭىزدى مەرەكە اتاپ وتىلۋدە. كورمەلەر, كونتسەرتتەر, فلەشموبتار, كونكۋرستار, تانىمدىق دارىستەر وتەدى.
ۇلتتىق دومبىرا كۇنى قازاقستاندا 2018 جىلدان باستاپ شىلدەنىڭ ءبىرىنشى جەكسەنبىسىندە اتاپ وتىلەدى. يۋنەسكو شەشىمى بويىنشا دومبىرا مەن كۇي ادامزاتتىڭ ماتەريالدىق ەمەس مۇراسى تىزىمىنە ەنگىزىلگەن.