قاراعاندىدا جەدەل جاردەم جۇرگىزۋشىسىن سوققىعا جىققان نۇربولات داكەباەۆ 2 جىلعا باس بوستاندىعىنان ايىرىلدى

فوتو: stan.kz

قاراعاندىدا جەدەل جاردەم كولىگى جۇرگىزۋشىسىن ساباعان نۇربولات داكەباەۆتىڭ ءىسى بويىنشا كەزەكتى سوت وتىرىسى ءوتتى. جاۋاپكەر سوتتا سوڭعى ءسوزىن سويلەدى. بۇل تۋرالى qandastar.kz   Stan.kz اقپارات اگەنتتىگى حابارلايدى.

سوتتالۋشى ءوز سوزىندە جاساعان قىلمىسىنا شىن جۇرەكتەن وكىنەتىنىن باسا ايتتى. ول تەرگەۋ يزولياتورىندا جەتى اي وتىرعاندا ءبارىن وي ەلەگىنەن وتكىزىپ, قاتەسىن تۇسىنگەن ەكەن.

«قۇرمەتتى سوت, مەن بولعان ىسكە قاتتى وكىنەمىن. زارداپ شەگۋشىدەن, سىزدەن, وتباسىلارىڭىزدان, قوعامنان كەشىرىم سۇرايمىن. ىستەگەن ىسىمە قاتتى وكىنەمىن. ءىسىم بۇكىل قوعامدى شوشىتقانىنا قاتتى وكىنەمىن. جەتى اي بويى اباقتىدا وتىرىپ, كوپ نارسەنى ءتۇسىنىپ, تارازىلادىم. سوت مىرزاعا ايتارىم, ماعان شەشىم شىعاراردا بوستاندىقتان ايىرماۋىڭىزدى سۇرايمىن. ءۇش بالام بارىن, اكە-شەشەمنىڭ بارىن ەسكەرۋدى سۇرايمىن. ءادىل شەشىم شىعاراتىنىڭىزعا سەنەمىن», – دەدى داكەباەۆ.

سوت وتىرىسىندا ول باس بوستاندىعىن شەكتەۋدى قولدانىپ, قاماۋدا بولعان ۋاقىتتى جازاعا قوسۋدى سۇرادى.

«جازاعا كەلسەك, مەن قىلمىستىق قۇقىق بۇزۋشىلىق جاساعان كەزدە قولدانىستا بولعان قىلمىستىق كودەكستىڭ 2024 جىلعى 27 قاڭتارداعى نۇسقاسىن قولدانۋىڭىزدى سۇرايمىن. باپتا ايىپپۇل تۇرىندەگى جازا قاراستىرىلعان. 2 مىڭ اەك-كە (7 384 000 تەڭگە) دەيىنگى مولشەردە نەمەسە سول مولشەردە تۇزەۋ جۇمىستارىنا, نە 800 ساعاتقا دەيىنگى مەرزىمگە قوعامدىق جۇمىستارعا تارتۋعا, نە ءۇش جىلعا دەيىنگى مەرزىمگە باس بوستاندىعىن شەكتەۋگە, نە سول مەرزىمگە باس بوستاندىعىنان ايىرۋعا جازالانادى. باس بوستاندىعىن شەكتەۋدى قولدانىپ, قاماۋدا بولعان ۋاقىتتى جازاعا قوسۋدى سۇرايمىن. پروكۋرور ماعان بيىل 16 ماۋسىمىنداعى قىلمىستىق كودەكستىڭ ءۇش جىلعا دەيىن باس بوستاندىعىنان ايىرۋدى كوزدەيتىن نۇسقاسىن قولدانۋدى سۇرايدى. زاڭعا ەنگىزىلگەن وزگەرتۋلەر مەن تۇزەتۋلەر مەنىڭ جاعدايىمدى ناشارلاتپاۋى كەرەك», – دەدى نۇربولات داكەباەۆ سوتتا.

سۋديا باقتيار اقانوۆ نۇربولات داكەباەۆتى بۇزاقىلىق نيەتپەن دەنساۋلىققا قاساقانا ورتاشا اۋىرلىقتاعى زيان كەلتىرگەنى ءۇشىن كىنالى دەپ تاپتى.

وسىلايشا ول جەدەل جاردەم جۇرگىزۋشىسىن سوققىعا جىققان قاراعاندى تۇرعىنى داكەباەۆ 2 جىلعا باس بوستاندىعىنان ايىرىلدى.

«سوت سوتتالۋشىنىڭ قىزمەتتىك مىندەتتەرىن اتقارۋ كەزىندە ادامعا زيان كەلتىرۋ فاكتىسىن اۋىرلاتاتىن ءمان-جاي دەپ تانىدى. جەڭىلدەتەتىن ءمان-جايلارعا كىناسىن شىن جۇرەكتەن مويىنداۋ جانە ەكى كىشكەنتاي بالانىڭ بولۋى جاتادى», – دەپ اتاپ ءوتتى سۋديا.

ەسكە سالا كەتەيىك, 22 تامىزدا قاراعاندىدا جەدەل جاردەم جۇرگىزۋشىسى تورەعالي بەرىكقالي ۇلىن ۇرىپ-سوعۋ ءىسى بويىنشا سوت وتىرىسى قايتا جالعاستى. پروتسەسس تىكەلەي ەفيردە كورسەتىلدى. بۇعان دەيىن ءىس بويىنشا جۇرگىزىلگەن ساراپتامادان كەيىن جاڭا ايىپتاۋ اكتىسى دايىندالۋىنا بايلانىستى سوت وتىرىسى ۋاقىتشا توقتاتىلعان.

العاشىندا نۇربولات داكەباەۆ كۇش قولدانۋ ارقىلى بۇزاقىلىق جاسادى دەپ ايىپتالدى. سوت-مەديتسينالىق ساراپتامالاردان كەيىن تاعىلعان ايىپ 107-باپتىڭ 2-بولىگىنىڭ 5-تارماعىنا, ياعني بۇزاقىلىق نيەتپەن جاسالعان جابىرلەنۋشىنىڭ دەنساۋلىعىنا قاساقانا اۋىرلىعى ورتاشا زيان كەلتىرۋگە جاتقىزىلدى.

سوڭعى وتىرىستا پروكۋرور داكەباەۆتى ءۇش جىلعا باس بوستاندىعىنان ايىرۋدى جانە ودان جابىرلەنۋشىنىڭ پايداسىنا 5 ميلليون تەڭگەدەن استام سومانى ءوندىرۋدى سۇراعان. داكەباەۆتىڭ ءوزى مورالدىق شىعىن كولەمىن قولجەتىمسىز دەپ اتادى.