Qarjaýbaı Nurymov advokattardan nege bas tartyp otyr?

Foto:Ulysmedia.kz

Advokat Saıda Táýekel Sherzat Polattyń isinde marqumnyń ákesi Qarjaýbaı Nurymov ne sebepti ózderinen bas tartqanyn túsinbeı otyrǵanyn aıtty, dep habarlaıdy qandastar.kz

 Ulysmedia.kz jazǵandaı, Aıtbek Amangeldi sońǵy ret Qarjaýbaı Nurymovty bıyl 18 qańtarda Almatyda kórgenin aıtady. Ol kezde Nurymov qamaýdan bosap shyqqan. Keńsede kezdesken kezde Qarjaýbaı “otbasymmen О́zbekstanǵa baryp demalyp kelemin” degen. Buǵan Aıtbekter tarapy durys qaraǵan. Qarjaýbaı ózin barynsha mazalamaýdy ótingen.

Biz ony asa qajettilik bolmasa, mazalamaıyq dedik. Búkil jumysty óz moınymyzǵa alyp, iske qatty kirisip kettik. Osydan keıin úshinshi adamdardan Talǵardan kóship ketkenin bildik. Baılanysqa shyqqymyz keldi. Sol ýaqyttan beri ol kimmen kezdesip, ne bolǵanyn, kim yqpal etkenin bilmeımiz, – dedi Aıtbek Amangeldi.

Advokat Saıda Táýekel Sherzattyń otbasymen onlaın rejımde jumys istegenin aıtady.

Biz otbasyǵa barynsha bárinen demalsa eken dep oıladyq. Sebebi onyń ózi (Qarjaýbaı) eshkimmen kezdeskisi kelmedi. Sol sebepti biz is materıaldaryn barynsha zertteýmen júrdik. Qazir proessýaldyq is barysynda birneshe qujatqa qol qoıar aldynda, ispen tanysar aldynda qońyraý shalyp edik, ázirge ókinishke qaraı osyndaı aqparatty estidik. О́zimiz túk túsinbeı otyrmyz. О́ıtkeni aramyzda eshqandaı kıkiljiń joq edi, – deıdi ol.

Advokat erteń Qarjaýbaımen kezdeskeli otyr.

Men jalpy áriptesterime alǵys aıtqym keledi. Olar kúni-túni, demalys kúnderi de, tańǵy beske deıin jumys istedi. Qonaev qalasyna qaıta-qaıta bardy. Munyń bári shyǵyn, densaýlyq, energııaǵa da. Biz basqa isterimizdiń bárin ysyryp tastap edik. Bizdiń basqa da advokattyq jumystarymyz bolǵan. Soǵan qaramastan, birge alyp júrdik. О́z jumysymyzdy bizdiń jábirlenýshi taraptyń múddesi úshin barynsha istedik. Ary qaraı qandaı sheshim qabyldanady – óz quqyqtary. Alaıda mindetti túrde habaryn beremiz, – dedi ol.

Buǵan deıin Sherzat isinde Qarjaýbaı Nurymov advokattarynan bas tartqany belgili bolǵan edi.

Eske salaıyq, buǵan deıin tergeý tolyq aıaqtalyp, is prokýrorǵa joldanǵanyn habarlaǵan edik.

Taraptar qylmystyq is materıaldarymen tolyq tanysty, is sotqa jiberý úshin prokýrorǵa joldandy.

TERGEÝ BARYSY

Tergeý barysynda 40 sot saraptamasy júrgizildi, shamamen 200 kýágerden jaýap alyndy, barlyq kúdiktilerdiń oqıǵa ornynda aıtqan jaýaptary tekserildi, proess qatysýshylary arasynda bettestirýler ótkizildi, sondaı-aq qylmystyń barlyq mán-jaıyn anyqtaýǵa baǵyttalǵan ózge de tergeý áreketteri júzege asyryldy.

Qylmysqa qatysýshylardyń barlyǵyna quqyqtyq baǵa bere otyryp, 8 beınematerıal zertteldi.

TALǴARDAǴY QANDY OQIǴA

Byltyr 4 qazan kúni Almaty oblysynda jas jigitter jabylyp, 16 jastaǵy jasóspirim Sherzat Bolatty óltirgeni dúıim jurtty dúr silkindirgen. Bir top jigit jasóspirimdi tepkilep jatqanyn mańaıdaǵy turǵyndar vıdeoǵa túsirip alǵan. Buzaqylar eshkimdi aıamapty. 12 qazanǵa qaraǵan túni marqumnyń otbasynyń úıi órtenip ketti. Sherzattyń týystary órtti kúdikti taraptyń áreketimen baılanystyrdy.