قارجىلىق ساۋاتى بار قازاقستاندىقتاردىڭ ۇلەسى – 40,5 پايىز

قارجى نارىعىن رەتتەۋ جانە دامىتۋ اگەنتتىگى توراعاسىنىڭ ورىنباسارى ولجاس قيزاتوۆ جىل سايىن قازاقستاندىقتاردىڭ قارجىلىق ساۋاتتىلىعى بويىنشا ساۋالناما جۇرگىزىلەتىنىن مالىمدەدى.

«قازىرگى كەزدە بانكتەردە, ميكروقارجى ۇيىمدارىندا, كوللەكتورلىق اگەنتتىكتەردەگى قارىز الۋشىلاردىڭ سانى 1 ملن 600 مىڭنىڭ كولەمىندە. ءبىز ەندى جىل سايىن پروبلەمالىق قارىز الۋشىلارمەن, بانكتەرمەن, ميكروقارجى ۇيىمدارىمەن, كوللەكتورلىق اگەنتتىكتەرمەن جۇمىس ىستەپ جاتىرمىز. قازىر حالىقتىڭ قارجىلىق ساۋاتتىلىقتى ارتتىرۋ – اگەنتتىكتىڭ ماڭىزدى باعىتتارىنىڭ ءبىرى. بىزدە جىل سايىن سوتسيولوگيالىق ساۋالناما جۇرگىزىلەدى. سونىڭ قورىتىندىسى بويىنشا قارجىلىق ساۋاتتىلىعى بار حالىقتىڭ ۇلەسى قازىرگى كەزدە 40,5 پايىزدى قۇرادى. بۇل ءبىزدىڭ ناقتى كورسەتكىشىمىز بولدى, ءبىز وعان قول جەتكىزدىك. ەكىنشىدەن, 2021 جىلدان 2024 جىلعا دەيىن اگەنتتىك ءوز تاراپىنان 550 وقىتۋ كۋرسىن وتكىزىپ, 53 مىڭ ادام وقىتۋدان ءوتتى», – دەدى ولجاس قيزاتوۆ.