كاسپي تەڭىزى 2 مەترگە تارتىلعان

فوتو: اشىق دەرەككوز

كاسپي تەڭىزىنىڭ توقتاۋسىز تارتىلۋى – قاۋىپتى. سالدارىنان سۋدىڭ تۇزدىلىعى ارتادى. تەڭىز تۇبىندە قىسىم ازايىپ, ۋلى گازدار شىعۋى مۇمكىن. ال بۇل كاسپيدىڭ وسىمدىگى مەن جانۋارلارىنا زيان, دەپ حابارلايدى qandastar.kz

تاۋەلسىز ەكولوگتار تەڭىز سۋىنىڭ ناقتى تارتىلۋ سەبەبىن انىقتاپ, ونىڭ اسەرى قانداي بولاتىنىن شۇعىل تۇردە زەرتتەۋ قاجەت دەپ دابىل قاعۋدا, دەپ جازادى qazaqstan.tv.

اقتاۋ قالاسىنىڭ تۇرعىنى, قۇستانۋشى قاناتبەك كەنجەعۇلوۆ وسىدان 3 جىل بۇرىن تەڭىزدە تاستىڭ ۇستىندە وتىرعان شاعالالاردى فوتوعا تۇسىرگەن. ال قازىر ول تاس جاعادان الىستاپ قالعان. كاسپيدىڭ ارقاسىندا اقتاۋدىڭ قىسى جىلى, جازى قوڭىر سالقىن. تەڭىزدىڭ تارتىلۋى اۋا رايىنا دا كەرى اسەر ەتەدى, دەيدى ول.

ء«بىز تەڭىزدىڭ قاسىندا تۇراتىن بولعاسىن كورىپ تۇرمىز, بىراق تەڭىز تەز تارتىلىپ بارا جاتىر سوڭعى 3-4 جىلدا. سەبەبى, مىنا جەردىڭ ءبارى سۋ بولعان. 2021 جىلى تۇسىرگەن فوتوم بار تاستىڭ ۇستىندە تۇرعان. سول قازىر قاراپ وتىرساڭ سۋى 1 مەترگە تومەندەدى. سۋ تەز تەز تارتىلىپ بارا جاتىر. سوعان الاڭداپ وتىرمىز.»

تەڭىز توقتاماي تارتىلا بەرسە, تۇز كونتسەنتراتسياسى كوبەيەدى. بۇل ونىڭ فلوراسى مەن فاۋناسىنا زيان. سودان سوڭ, تەڭىزدىڭ تۇبىندەگى سۋدىڭ قىسىمى ازايىپ, ۋلى گازدار شىعادى. ونىڭ سالدارىنان سۋ جانۋارلارى قىرىلىپ قالۋى مۇمكىن. سوندىقتان تولىققاندى عىلىمي زەرتتەۋ جۇرگىزىپ, كاسپيدىڭ ماڭايىنداعى ەلدەرمەن كەلىسە وتىرىپ, تەڭىزدى ساقتاپ قالۋ قاجەت, دەيدى تاۋەلسىز ەكولوگ.

«كاسپي تەڭىزگە قۇيىلىپ جاتقان سۋدىڭ 80 پايىزى ول ەدىلدەن كەلىپ جاتىر. ەدىلدەن قۇيىلاتىن سۋ ازايعانى انىق. سەبەبى رەسەي تاراپىنان كوپ مولشەردە سۋ پايدالاناتىن قوندىرعىلار قۇرىلىپ, جۇمىس جاساپ جاتىر ەكەن. سوندىقتان ول جەردە رەسەي مەن قازاقستان جالپى 5 مەملەكەت اراسىندا كەلىسىمشارتتار جاسالىپ, وسىنداي كەدەرگىلەردى بولدىرماۋ كەرەك دەپ ويلايمىن.» ادىلبەك قوزىباقوۆ, تاۋەلسىز ەكولوگ