Qasym, Jomart, Kemel: Túrkistandyq kelinshek úshem bosanyp, 10 balanyń anasy atandy

Foto: ashyq derekkóz

Keles aýdany, Abaı aýylynyń 33 jastaǵy turǵyny 7 qyzdan keıin úshem bosanyp, 10 balanyń anasy atandy, dep habarlaıdy  qandastar.kz.

Kópten kútken uldaryna Qasym, Jomart, qyzyna Kemel dep at qoıǵan. Túrkistan oblysynda ómirge kelgen úshem búgin otbasymen qaýyshty. Qasym, Jomart, Kemel – Myńjasar otbasynyń kópten kútken qýanyshy.

Gúlnaz Myńjasar merziminen buryn, ıaǵnı, 33 aptasynda bosanǵan. Keıbir qarsy kórsetkishterge baılanysty kópbalaly anaǵa ota jasalǵan. Ákesi Baqyt Myńjasar qurylysta jumys isteıdi. Al anasy jumyssyz. Balalardyń atyn anasy qoıǵan. Shala týǵan shaqalaqtardyń salmaǵy 2000 gramm shamasynda bolǵan.

«Ota jasaǵan jáne jalpy №1 Perınataldyq ortalyǵynyń akýsherlik blogyna  alǵysymdy bildiremin. Medıınalyq mekemelerde qolaıly jaǵdaı jasap, zamanaýı jabdyqtarmen qamatamasyz etkeni úshin jáne mamandardyń joǵary kásibıligi úshin alǵysym sheksiz. Esimderin prezıdentimiz sııaqty úlken azamat bolsyn degen yrymmen Qasym, Jomart, Kemel dep qoıdyq»,– dedi úshemniń anasy.

Oblys ákimdigi habarlaǵandaı, nárestelerdiń salmaǵy – 1 keli 965 gramm, 1 keli 925 gramm jáne 1 keli 975 gramm.

Úshemniń ata-anasynyń 7 qyzy bar. Qazir qyzdary baýyrlarymen qaýyshatyn kúndi asyǵa kútip júr. Sábılerdiń ata-anasy №1 Perınataldyq ortalyǵynyń dárigerlerine alǵystaryn bildirdi.