«Qatty urystym»: Tanymal aktrısa enesimen arasy qalaı ekenin aıtyp berdi

Tanymal aktrısa Aqerke Arys 7-arnadaǵy «Jarqyraǵan juldyz» baǵdarlamasynda enesimen qarym-qatynasy týraly shynaıy oılarymen bólisti. Ol kelin men ene arasyndaǵy syılastyq durys qoıylǵan shekaradan bastalatynyn aıtty, dep habarlaıdy qandastar.kz aqparat portaly. 

«Shynymdy aıtsam, enemmen qatty urystym. Qatty renjistim. О́te jaqyn da boldym. Kúldim de, qurby da boldym. Qyzy da boldym, kelini de boldym. Biraq “kelindi qyzymdaı kóremin” degenge qarsymyn. Árkim óz ornynda bolýy kerek. О́tirik istemeý kerek. Kelin be? Kelin! Qyzyń ba? Qyzyń! Ene me? Ene! Syılastyq pen shekara bolýy kerek», – dedi aktrısa.

Aqerkeniń aıtýynsha, olar enesimen úsh jyl birge turǵan. Qazir bólek turyp jatqandaryna bir jyl bolǵan. Aktrısanyń pikirinshe, bólek turý jas otbasyǵa úlken tájirıbe beredi.

«Enemmen úsh jyl birge turdyq. Qazir bólek turyp jatqanymyzǵa bir jyl boldy. Eneńmen turǵannyń bir jaqsysy — bilmegenińdi úıretedi. Qıyndyqtarda úlken adamnyń bolýy jeńil. Biraq ata-ana balasynyń eseıýi úshin ony bólek shyǵarýy kerek dep oılaımyn. Birge turǵanda, únemi aqyldasý kerek degen oı turady», – dedi Aqerke Arys.