جاڭالىقتار
قازاق ەلى الەمدەگى بىرنەشە مەملەكەتتى ءوز قامقورلىعىنا الدى
دەنساۋلىق ساقتاۋ مينيسترلىگى قازاقستان ۇكىمەتىنىڭ توتەنشە رەزەرۆى ەسەبىنەن گۋمانيتارلىق كومەك كورسەتىلەتىنىن جاريالادى.
ىزگىلىك جاردەم «قازاقستان رەسپۋبليكاسى ۇكىمەتىنىڭ رەزەرۆىنەن قاراجات ءبولۋ تۋرالى» دەپ بىردەي اتالعان بىلتىرعى 26 جەلتوقسانداعى №1193 جانە 28 جەلتوقسانداعى №1212 ۇكىمەت قاۋلىلارى اياسىندا جۇزەگە اسىرىلىپ وتىر.
«بۇل شىعىستار دارىلىك زاتتار مەن مەديتسينالىق بۇيىمداردىڭ قۇنىن وتەۋگە باعىتتالعان. اتاپ ايتقاندا, ەل ۇكىمەتىنىڭ 2023 جىلعى 26 جەلتوقسانداعى №1193 قاۋلىسىنا سايكەس, اۋعانستانعا رەسمي ىزگىلىك كومەك كورسەتۋ ءۇشىن «سق-فارماتسيا» جشس ۇسىنعان دارىلىك زاتتاردىڭ قۇنىن وتەۋگە جالپى سوماسى 298 ملن 375,7 مىڭ تەڭگە قاراجات ءبولىندى. سونداي-اق قازاقستان ۇكىمەتىنىڭ 2023 جىلعى 28 جەلتوقسانداعى №1212 قاۋلىسىنا سايكەس, پالەستينا مەملەكەتىنە رەسمي ىزگىلىك كومەك كورسەتۋ ءۇشىن «سق-فارماتسيا» جشس ۇسىنعان دارىلىك زاتتار مەن مەديتسينالىق بۇيىمداردىڭ قۇنىن وتەۋگە جالپى سوماسى 66 ملن 88,1 مىڭ تەڭگە قاراجات بەرىلدى», – دەپ ءتۇسىندىردى دەنساۋلىق ساقتاۋ مينيسترلىگى.
ۆەدومستۆونىڭ دەرەگىنشە, گۋمانيتارلىق كومەككە باعدارلانعان «100 – قر ۇكىمەتىنىڭ توتەنشە رەزەرۆى ەسەبىنەن اعىمدى ءىس-شارالار وتكىزۋ» اتالعان بيۋدجەتتىك باعدارلاما اياسىندا 2022 جىلى – 585,9 ميلليون, 2023 جىلى – 386,4 ميلليون, 2024 جىلى – 364,4 ميلليون تەڭگە ءبولىنىپتى.
دسم جەلىسى بويىنشا 2021–2023 جىلدارداعى گۋمكومەك نەگىزىنەن, پاندەميا جانە ونىڭ زارداپتارىمەن كۇرەسكە باعىتتالدى. سوندىقتان اتالعان ەكى ەلگە 25 مىڭ دوزا وتاندىق «QazVac» ۆاكتسيناسى, 4 008 بىرلىك ءتۇرلى ءدارى-دارمەك, 6 ميلليون دانا ءۇش قاباتتى ماسكا, 850 مىڭ رەسپيراتور, 50 مىڭ قورعانىس كوستيۋمى, 105 بىرلىك وكپەنى جاساندى جەلدەتۋ اپپاراتى تەگىن ۇسىنىلعان كورىنەدى
بۇل رەتتە اۋعانستانعا كومەك ءۇندىستان اۋماعى ارقىلى جەتكىزىلگەن ەكەن. تيىسىنشە, ىزگىلىك جۇكتەرىن دە الماتى-دەلي مارشرۋتىمەن ۇشاقتار تاسىمالداعان.
2024 جىلى قازاقستاننىڭ اۋعانستان جانە پالەستينا مەملەكەتتەرىنە تەگىن 1 605 149 ءدارى-دارمەك, 1 559 400 بىرلىك ءۇش قاباتتى مەديتسينالىق بەتپەردە, 26 بىرلىك وباعا قارسى جيناق جەتكىزىپ بەرەتىنى كورسەتىلگەن.
جالپى, اۋعانستان مەن پاكىستانعا دارىلىك زاتتاردى جەتكىزۋگە بيىل 364 ميلليوننان استام قاراجاتتىڭ ءبولىنۋىن قازاقستاندىقتار سىنعا الۋى مۇمكىن. بۇل تۇسىنىكتى دە ۇكىمەت الدىمەن ءوز جۇرتىن جارىلقاپ العانى ءجون. دەگەنمەن, بۇل سومانى كوپ دەۋگە كەلمەيدى.
Finprom مونيتورينگ اگەنتتىگىنىڭ ساراپشىلارى ەلىمىزدىڭ كىمگە كومەكتەسكەنىن جانە كىمنەن كومەك العانىن انىقتادى.
قارجى مينيسترلىگىنىڭ مەملەكەتتىك كىرىستەر كوميتەتىنىڭ مالىمەتىنشە, 2023 جىلدىڭ قاڭتار-جەلتوقسانىندا قازاقستان ءتۇرلى ەلدەرگە 5 ميلليون دوللارعا گۋمانيتارلىق كومەك جىبەرىپتى. بۇل 2022 جىلمەن سالىستىرعاندا 2,4 ەسە از!
جىلدارعا تاراتا ايتساق, قازاق ەلى وزگە ءزارۋ مەملەكەتتەرگە 2019 جىلى – 1,3 ملن, 2020 جىلى – 3,1 ملن, 2021 جىلى – 7,5 ملن, 2022 جىلى – 11,8 ملن, 2023 جىلى – 5 ملن دوللار ىزگىلىك جۇگىن اتتاندىردى. ياعني, كومەگىنىڭ كولەمى بىلتىر كەيىنگى ءۇش جىلداعى ەڭ تومەن كورسەتكىشكە جەتتى.
2022 جىلعى ارتۋدى ۋكرايناعا كومەكپەن تۇسىندىرۋگە بولادى.
بىراق قازاقتىڭ قامقورلىعىن اۋعاندار كوبىرەك كورۋدە. رەسپۋبليكامىزدان جىبەرىلگەن گۋمانيتارلىق كومەكتىڭ جارتىسىنان استامى اۋعانستانعا جونەلتىلدى.
قازاقستاننىڭ مۇقتاج ەلدەرگە جەتكىزگەن گۋمانيتارلىق كومەگىنىڭ:
جارتىسىنان استامى – ازىق-ت ۇلىك تاۋارلارىنا تيەسىلى (2 ملن 844,3 مىڭ دوللارى). بۇل 2022 جىلعا قاراعاندا بىردەن 44,1% كوپ (1 ملن 973,7 مىڭ دوللار بولعان).
ودان كەيىن كيىم مەن اياق كيىم تۇر (244,7 مىڭ دوللارى). كولەمى ءبىر جىل بۇرىنعىدان (369,7 مىڭ دوللاردان) ۇشتەن بىرگە كەمىگەن.
تاعى 89,7 مىڭ دوللارى ماشينالار مەن جابدىقتارعا جۇمسالدى. ءبىر جىل بۇرىنعىدان (135,7 مىڭ دوللاردان) 33,9% ازايدى.
2022 جىلى قازاقستان ءتۇرلى ەلدەرگە 4 ملن 394,4 مىڭ دوللارعا ءدارى-دارمەكتەر, كوروناۆيرۋسقا قارسى وتاندىق ۆاكتسينانى جەتكىزىپتى. 2023 جىلى بۇل سوما 0,001 مىڭ دوللارعا دەيىن قۇلدىرادى.
قالعان تاۋارلار مەن كەرەك-جاراقتار 1 ميلليون 775,1 مىڭ دوللاردى قۇرادى. بۇل سانات 2022 جىلى 4 ملن 937,3 مىڭ دوللارعا جەتىپ ەدى.
وتكەن جىلى ەلىمىزدىڭ ءوزى شەتەلدەن 25,6 ميلليون دوللار گۋمكومەك الدى. وسى كورسەتكىش 2022 جىلعا قاراعاندا 3,4% ءوستى. جىلدارعا بولسەك, قازاقستان الەمدەگى ءتۇرلى قايىرىمدى ەلدەردەن 2019 جىلى – 9,9 ملن, پاندەميا ەلدىڭ ەڭسەسىن ەزگەن 2020 جىلى – 19,1 ملن, 2021 جىلى – 19,1 ملن, 2022 جىلى – 24,8 ملن, بىلتىرعى 2023 جىلى 25,6 ميلليون دوللار گۋمانيتارلىق كومەك الدى. ياعني, قازاق ەلىنە كومەك سۇيىلماي, ارتىپ كەلەدى.
2023 جىلدىڭ قاڭتار-جەلتوقسانىندا رەسپۋبليكامىزعا شەتەلدەن تابىستالعان بارلىق گۋمانيتارلىق كومەكتىڭ:
جارتىسىنا جۋىعى ءدارى-دارمەك (12 ملن 98,7 مىڭ دوللار). 2022 جىلدىڭ وسى كەزەڭىمەن سالىستىرعاندا 3,7% كوپ (2022 جىلى ەلىمىزگە 11 ملن 669,2 مىڭ دوللاردىڭ مەديكامەنتتەرى تەگىن بەرىلىپتى)
501,1 مىڭ دوللاردىڭ كيىمى مەن اياق كيىمى گۋمكومەك تۇرىندە بەرىلگەن. بىرقاتار ساراپشى ولاردىڭ ءبىر بولىگى جەتىمحانالارعا, قارتتار ۇيلەرىنە جانە باسقاسىنا تۇسپەي, «سەكوند-حەند» نەمەسە «اۋتلەت» اتالاتىن دۇكەندەر جەلىسىنە ءتۇسۋى مۇمكىندىگىن جوققا شىعارمايدى. قالاي بولعاندا, تەگىن كيىم-كەشەك لەگى ازايىپ كەلەدى: كولەمى ءبىر جىل بۇرىنعىدان بىردەن 2,2 ەسە كەمىدى. 2022 جىلى 1 ملن 102,6 مىڭ دوللاردىڭ كيىمى مەن اياق كيىمى كەدەندە «گۋمكومەك» رەتىندە راسىمدەلگەن.
تەگىن بەرىلگەن ماشينالار مەن جابدىقتار بىلتىر نەبارى 30,7 مىڭ دوللاردى قۇرادى جانە ءبىر جىل بۇرىنعىدان بىردەن 7,5 ەسە از (231,5 مىڭ دوللار بولىپ ەدى). بۇعان رەسەيگە ساتۋعا سانكتسيا قويىلعان تاۋارلارمەن كۇرەس تە ىقپال ەتۋى مۇمكىن. كورشىگە باعىتتالۋى ىقتيمال دروندار, قوسارلاما ماقساتتاعى بۇيىمدار جانە باسقا دا جابدىقتار ەلىمىزگە قىتايدان, باتىس ەلدەرىنەن ەنگىزىلگەندە, «گۋمكومەك» رەتىندە راسىمدەلۋى, ارى قاراي اينالما جولدارمەن رەسەي اسۋى عاجاپ ەمەس.
باسقا تاۋارلار 12 ميلليون 974,7 مىڭ دوللارعا جەتتى. 2022 جىلى بۇل سانات 11 ملن 759,4 مىڭ دوللاردى قۇراعان.
