«قازاق قىزدارىنىڭ قۇنى «كامريدەن» ارزان»: قالىڭمال باعاسىن كوتەرۋدى ۇسىنعان بلوگەر سىنعا ۇشىرادى

الەۋمەتتىك جەلىدە گۇلجان ەسىمدى بلوگەر ۇيلەنىپ جاتقان ازاماتتار قىز بەرىپ جاتقان اتا-اناعا ءبىر-ءبىر جارىم ملن تەڭگە بەرىپ قۇتىلا سالاتىنىن ايتىپ, قالىڭمال باعاسىن 10 ميلليونعا دەيىن كوتەرۋدى ۇسىندى, دەپ حابارلايدى qandastar.kz  Skifnews.kzاقپارات پورتالىنا سىلتەمە جاساپ.

«قازاقتارعا قالىڭمالدىڭ باعاسىن 10 ملن تەڭگەگە دەيىن كوتەرۋ كەرەك. قازاقتىڭ قىزدارىنىڭ باعاسى كامريدەن دە تومەن ءتۇسىپ كەتتى. ءبىر, ءبىر جارىم ملن تەڭگە بەرىپ قۇتىلا سالادى. مەن مىسالى وعان وتە قارسىمىن. ساۋدالاسىپ جاتقان جوقپىن نەمەسە قىزدى ساتىپ جاتقان جوقپىن. بۇل جەردە قازاق قىزىنىڭ قۇندىلىعىن, ءوزىمىزدىڭ سالت-ءداستۇرىمىزدىڭ قۇندىلىعىن قايتادان جاڭعىرتىپ, كوتەرۋ كەرەك دەپ ويلايمىن», – دەدى ول. 

ونىڭ ايتۋىنشا, قۇدالاردىڭ سىيلاستىعى مەن جاس جۇبايلاردىڭ ءبىر-بىرىنە قۇرمەتى اقشاعا تىرەلىپ تۇر.

«تۇرىكتەر قىز الۋ ءۇشىن بالەنباي كەلى التىن بەرەدى, بىراق اجىراسۋ دەگەن نارسە جوق. ءبىز بۇكىل دۇنيەجۇزى بويىنشا اجىراسۋدان ءبىرىنشى ورىندى الىپ تۇر ەكەنبىز. ونىڭ سەبەبى قۇنسىزداندىرۋدىڭ كەسىرى. ەگەر ءبىز ءبىر قىز الۋ ءۇشىن 10 ملن تەڭگە بەرەتىن بولساق, ەكى جاقتىڭ دا ءبىر-بىرىنە دەگەن قارىم-قاتىناسى باسقاشا بولادى. قىز بالانىڭ الدىنداعى جىگىتتىڭ دە ابىرويى جوعارى بولادى», – دەيدى گۇلجان.

الايدا جەلى قولدانۋشىلارى گۇلجاندى سىناپ تاستادى.

«قازاق قىزىنىڭ قالىڭمالىن ەمەس, تاربيەسىن كوتەرۋ كەرەك. ۇلتتىق تاربيە مەن ارىن ساقتاعان قازاق قىزى بولۋىن قاداعالاۋ كەرەك», «تەڭىن تاپسا تەگىن بەر», «بەس ۇلىڭ بولسا كورەرمىز», «10 ملن تەڭگە بەرىپ, اجىراسىپ جاتقاندار بار», «قىز ساۋدالاساتىن مال ەمەس, قىزىڭا ءوزىڭ تاربيە بەر, بىراق ساعان دا تاربيە بەرۋ كەرەك سياقتى», «قايداعى 10 ملن, قازاقستاندا سونداي تابىس كوزى بار ما», «قىزدى ماشيناعا تەڭەگەندى سەنەن كوردىم», دەپ پىكىر قالدىرىپتى كوپشىلىك.