«Qazaq qyzdarynyń quny «Kamrıden» arzan»: Qalyńmal baǵasyn kóterýdi usynǵan bloger synǵa ushyrady

Áleýmettik jelide Gúljan esimdi bloger úılenip jatqan azamattar qyz berip jatqan ata-anaǵa bir-bir jarym mln teńge berip qutyla salatynyn aıtyp, qalyńmal baǵasyn 10 mıllıonǵa deıin kóterýdi usyndy, dep habarlaıdy qandastar.kz  Skifnews.kzaqparat portalyna silteme jasap.

«Qazaqtarǵa qalyńmaldyń baǵasyn 10 mln teńgege deıin kóterý kerek. Qazaqtyń qyzdarynyń baǵasy Kamrıden de tómen túsip ketti. Bir, bir jarym mln teńge berip qutyla salady. Men mysaly oǵan óte qarsymyn. Saýdalasyp jatqan joqpyn nemese qyzdy satyp jatqan joqpyn. Bul jerde qazaq qyzynyń qundylyǵyn, ózimizdiń salt-dástúrimizdiń qundylyǵyn qaıtadan jańǵyrtyp, kóterý kerek dep oılaımyn», – dedi ol. 

Onyń aıtýynsha, qudalardyń syılastyǵy men jas jubaılardyń bir-birine qurmeti aqshaǵa tirelip tur.

«Túrikter qyz alý úshin bálenbaı keli altyn beredi, biraq ajyrasý degen nárse joq. Biz búkil dúnıejúzi boıynsha ajyrasýdan birinshi oryndy alyp tur ekenbiz. Onyń sebebi qunsyzdandyrýdyń kesiri. Eger biz bir qyz alý úshin 10 mln teńge beretin bolsaq, eki jaqtyń da bir-birine degen qarym-qatynasy basqasha bolady. Qyz balanyń aldyndaǵy jigittiń de abyroıy joǵary bolady», – deıdi Gúljan.

Alaıda jeli qoldanýshylary Gúljandy synap tastady.

«Qazaq qyzynyń qalyńmalyn emes, tárbıesin kóterý kerek. Ulttyq tárbıe men aryn saqtaǵan qazaq qyzy bolýyn qadaǵalaý kerek», «teńin tapsa tegin ber», «bes ulyń bolsa kórermiz», «10 mln teńge berip, ajyrasyp jatqandar bar», «qyz saýdalasatyn mal emes, qyzyńa óziń tárbıe ber, biraq saǵan da tárbıe berý kerek sııaqty», «qaıdaǵy 10 mln, Qazaqstanda sondaı tabys kózi bar ma», «qyzdy mashınaǵa teńegendi senen kórdim», dep pikir qaldyrypty kópshilik.