Qazaq munaıy Germanııanyń energetıkalyq qaýipsizdigin qamtamasyz etpek

Foto: DALA INSIDE

Germanııanyń Brandenbýrgtegi munaı óńdeý zaýyty Qazaqstannan munaı jetkizýdi uzaq merzimge sozatyny málim boldy.

«Kánler Olaf Shóltyń Astana sapary barysynda jarııa etilgen jańalyq eki el arasyndaǵy energetıkalyq seriktestiktiń jańa kezeńine jol ashady», – dep jazady DALA INSIDE.

Brandenbýrg federaldy aımaǵyndaǵy Shvedt qalasynda ornalasqan Petrolchemisches Kombinat Schwedt (PCK) zaýyty buryn Reseı munaıyna basybaıly táýeldi bolyp, eldiń soltústik-shyǵysyn janarmaı jáne basqa da ónimdermen qamtamasyz etken-di.

Alaıda, Kremldiń Ýkraınaǵa basyp kirýi jáne osyǵan baılanysty sankııalar saldarynan, Berlın reseılik munaı ımportyna shekteý qoıyp, jańa tasymal kózderin izdestire bastady. Nátıjesinde Qazaqstanmen aradaǵy munaı jetkizý kelisimderi mańyzdy ról atqaryp otyr.

2023 jyldan beri PCK zaýyty tómen qýatta jumys istep kelgenimen, Qazaqstannan keletin munaı kólemin birtindep arttyrý jospary júzege asyrylýda.

Byltyr elimiz osy zaýytqa 1 mıllıon tonna munaı jetkizgen, bıyl bul kólemdi 1,4 mıllıon tonnaǵa deıin arttyrý kózdelip otyr. Jańa kelisimder qazaqtyń «qara altynyn» 2024 jyldan keıin de úzdiksiz jetkizýdi kózdeıdi.

Aıta ketsek, PCK munaı óńdeý zaýytynyń kóp bóligi «Rosnefttiń» nemis jerindegi enshiles uıymdaryna tıesili bolǵanymen (54%), Berlın 2022 jyly bulardyń baqylaý paketin senimgerlik basqarýǵa alǵan. Bul qadam Máskeýmen baılanysty táýekelderdi azaıtý maqsatynda jasalǵan bolatyn.

Qazir nemis shendileri Qazaqstanmen Rosneft Germany arqyly qosymsha kelisimshartqa qol qoıyp jatyr. Osynaý kelisim munaı tasymalyn qaýipsiz etý jáne Rosneft Germany, PCK Schwedt, Miro jáne Bayernoil munaı óńdeý zaýyttarynyń turaqty jumysyn qamtamasyz etý maqsatynda jasalýda.

Kelissóz nátıjesine eki taraptyń ta kóńili tolǵan tárizdi: nemisterge 2025 jyldyń aıaǵyna deıin aı saıyn 100 myń tonna munaı jetkizip turýdy moınymyzǵa aldyq. Aldaǵy ýaqytta bul kólemdi ulǵaıtý múmkindigi de qarastyrylýda.

О́z kezeginde Berlın «Rosnefttiń» Germanııadaǵy enshiles kásiporyndaryna jańa qojaıyn izdep jatqan jaıy bar. Jańa menshik ıesi tabylsa, Eýrokomıssııa tarapynan 400 mln eýro kóleminde qomaqty sýbsıdııa bólinip, Rostok portynan Shvedtke deıin sozylyp jatqan munaı qubyry tolyq jańarady. Bul Qazaqstannan keletin munaı kólemin arttyrýǵa jáne jetkizý proesin jeńildetýge yqpal etpek. Alaıda, álgi aqsha tek «Rosneft» menshik ıesi bolmaǵan jaǵdaıda ǵana beriledi degen shart bar.

Qazaqstannan Germanııaǵa jetkiziletin munaı Reseı aýmaǵy arqyly ótedi. Munaı tasymaly úshin qoldanylatyn negizgi marshrýt — Reseıdegi «Drýjba» munaı qubyry.