Áleýmet jáne qoǵamJańalyqtar
Qazaqsha sóıleýdi talap etken qyzmetkerin jumystan qýǵan kompanııaǵa jappaı baıkot jarııalandy
Foto: ashyq derekkóz
Áleýmettik jeli qoldanýshylary qazaq tilin talap etken qyzmetkerin jumystan qýǵan kompanııa narazy bolyp, jappaı baıkot jarııalap jatyr, dep habarlaıdy qandastar.kz
Malim.kz portaly jaǵdaıdy egjeı-tegjeıli baıandady.
Bári qalaı bastaldy?
Asylhan esimdi azamat Magnum saýda jelisi arqyly azyq-túlikke tapsyrys berip, ony jetkizgen kýrermen tildesken. Tildesý barysynda kýrerdiń qazaqsha sóıleýin talap etkenin jelige jazǵan. Jazbany oqyǵan kompanııa basshylyǵy eshqandaı eskerý bermesten, ashyq talqylamastan, qyzmetkerdi birden jumystan shyǵaryp jibergen.
Men shaǵym túsirmedim. Biraq postymdy oqyp, kýrerdi jumystan shyǵarypty. Endi qaıta kire almaıtyn bolǵan, — dep aqtaldy jeli qoldanýshysy.
Osydan keıin Facebook áleýmettik paraqshasynda rezonans bastaldy. Rýslan Túsipbekov esimdi belsendi bul memlekettik tilge jasalǵan qastandyq ekenin aıtady.
Bir qazaq ekinshi qazaqty qazaqsha sóıle dep renjitti. Sońǵysy jumystan qýyldy. Birinshisi ókinetin sııaqty, biraq Magnum kompanııasynyń logıstıkalyq dırektorynyń ózi habarlasyp, máseleni sheshkenine óte qýanyshty.Mine, Táýelsizdiktiń 34-shi jylynda Uly dalada bolyp jatqan jaıttar osyndaı. Mysaly, Reseıdegi jaǵdaıdy elestetip kórińiz. Reseıde orys tilinde sóıleýdi suraǵan kýrerdi jumystan shyǵarý – qoǵamda úlken rezonans týǵyzar edi. Bul jaǵdaıda Reseıde, resmı til — orys tili bolǵandyqtan, qyzmetkerlerdiń resmı tilde sóılesýge quqyǵy bar dep sanalady. Memlekettik tilde sóılesýdi talap etken qyzmetkerdi esh jerde jumystan shyǵarýǵa jol berilmeıdi. Bizge ońaı! Osydan keıin bizdi kim syılaıdy?- deıdi Rýslan Túsipbekov.
Bul postqa Magnum ókili jaýap berip, konstıtýııada orys tili memlekettik tilmen teń qoldanylatynyn alǵa tartty.
Biz óz jumysymyzda Qazaqstan Respýblıkasynyń zańnamasyn basshylyqqa alamyz. Memleketimizdiń Konstıtýııasyna sáıkes: «Memlekettik uıymdarda, jergilikti ózin-ózi basqarý organdarynda, jáne uıymdarda orys tili resmı túrde qazaq tilimen teń qoldanylady». Biz adamdardy ultyna qaraı bólmeımiz jáne barlyq satyp alýshylarymyzǵa birdeı qamqorlyq jasaımyz. Biz jumysymyz barysynda satyp alýshylardy tárbıelemeýimiz jáne olarǵa mádenı nemese basqa da dúnıetanymdyq talaptar qoımaýymyz kerek. Sondyqtan biz qyzmetkerimizdi sóılesý tili úshin emes, satyp alýshymen qarym-qatynas jasaý máneri, jumys ornyndaǵy laýazymdy asyra siltep paıdalanǵany úshin jumystan bosattyq, — deıdi kompanııa ókili.
Al jeli qoldanýshylary, belsendi azamattar «qazaqtyń nanyn, sýyn iship otyryp, qazaq tilin qurmettemeıtin Magnum-nyń quny biz úshin kók tıyn», — dep narazylyq bildirip jatyr.
