Qazaqstan bal jetkizýshi úzdik 100 eldiń qataryna endi Asal

Qarjy mınıstrligi Memlekettik kirister komıtetiniń derekteri boıynsha, ótken jyly elimiz jalpy somasy 406,2 myń dollarǵa (182,8 mln teńge) 222,7 tonna bal eksporttady.

Qazaqstannan bal eksporty

Qazaqstandyq tabıǵı baldy iri kólemde satyp alýshy elder qatarynda О́zbekstan, Qytaı, Saýd Arabııasy jáne Germanııa bar.

2023 jyly О́zbekstan Qazaqstannan jalpy somasy 112,2 myń dollarǵa (50,5 mln teńge) 111 tonna, Qytaı – 176,6 myń dollarǵa (79,5 mln teńge) 45,7 tonna, Saýd Arabııasy – 44,4 myń dollarǵa (20 mln teńgege jýyq) 22,2 tonna, Germanııa – 23,8 myń dollarǵa 21 tonna bal satyp alǵan (10,7 mln teńge).

Sonymen qatar, byltyr tabıǵı bal eksporty kórsetkishine súıensek, Qazaqstan basqa elderge jalpy somasy 153,1 myń dollarǵa (68,9 mln teńge) 58,3 tonna bal jetkizgen. Bul 2022 jylmen salystyrǵanda 3,5 ese joǵary.

Aıta keteıik, 2022 jyl jalpy alǵanda bal eksportynyń tómendeýimen erekshelenedi. 2017-2021 jyldar aralyǵynda baldy shet memleketterge shyǵarýdyń turaqty ósýi baıqaldy. Eger 2017 jyly Qazaqstan jalpy somasy 220,8 myń dollarǵa (99,3 mln teńge) 87,3 myń tonna bal eksporttasa, 2021 jyly atalǵan kórsetkish 328,5 myń dollarǵa jetip, (147,8 mln teńge) 235 tonnany qurady.

Álemdegi eń iri bal jetkizýshi elder

Resource Trade agenttiginiń málimetinshe, Qazaqstan álemdegi eń iri TOP-100 bal jetkizýshi el qataryna endi. 2020 jyly osy ónimniń eksporty jalpy somasy 520 myń dollarǵa jetken, (234 mln teńgege jýyq) 195,5 tonnany qurady. Bul bal eksportyndaǵy tabys deńgeıi boıynsha álemdegi 73 kórsetkish.

Iri kólemde bal jetkizýshi elder qatarynda Jańa Zelandııa (jalpy somasy 333,3 mln dollarǵa 16,5 myń tonna), Qytaı (127 myń tonna, 229,6 mln dollar) jáne Argentına (72,9 myń tonna, 179,6 mln dollar) boldy. EAEO elderine keletin bolsaq, 2020 jyly Reseı jalpy somasy 4,7 mln dollarǵa 2,3 myń tonna bal, Qyrǵyzstan 2 mln dollarǵa 451,5 tonna, Belarýs 460 myń dollarǵa 104,7 tonna, Armenııa 140 myń dollarǵa 20,8 tonna bal jetkizdi. Bul sáıkesinshe álemdegi 40, 51, 75 jáne 87 kórsetkish.