جاڭالىقتار
قازاقستان بيلىگى قانداستاردى كوشىرەتىن وڭىرلەردى ايقىندادى
ەڭبەك جانە حالىقتى الەۋمەتتىك قورعاۋ مينيسترلىگى 2024 جىلدىڭ 1 اقپانىنداعى جاعداي بويىنشا 1 306 ەتنيكالىق قازاق تاريحي وتانىمەن تابىسىپ, قانداس مارتەبەسىن العانى جونىندە اقپارات تاراتتى, دەپ حابارلايدى qandastar.kz.
قانداستار قاي ەلدەردەن كوشىپ كەلدى?
مينيسترلىكتىڭ حابارلاۋىنشا, جالپى 1991 جىلدان بەرى رەسپۋبليكاعا 1 ملن 129,6 مىڭ ەتنيكالىق قازاق ورالعان.
جىل باسىنان باستاپ قازاقستانعا كەلگەن قانداستاردىڭ جارتىسى 48,9% قىتايدان, 29,6% وزبەكستاننان, 8,3% موڭعوليادان, 4,4% رەسەيدەن, 7,3% تۇرىكمەنستاننان جانە 1,5% باسقا ەلدەردەن كەلگەنىن حابارلايدى.
وسى جىلعى 1 اقپانداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 56,2%-دى, ەڭبەككە قابىلەتتى جاستان كىشى 33,6%-دى جانە زەينەتكەرلەر 10,2%-دى قۇرايدى.
ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا 15%-ى جوعارى ءبىلىمدى, 20,2%-ى ورتا كاسىبي ءبىلىمدى, 54,6%-ى جالپى ورتا ءبىلىمدى, جانە 10,2%-نىڭ ءبىلىمى جوق.
قانداستار قايدا كوشىرىلدى?
قونىس اۋدارعان ەتنيكالىق قازاقتار رەسپۋبليكانىڭ ءتۇرلى وڭىرلەرىنە قونىستانعان. سونىمەن بىرگە, قانداستاردى قونىستاندىرۋ ءۇشىن كەلەسىدەي ەڭبەك كۇشى تاپشى وڭىرلەر انىقتالدى: اقمولا, اباي, قوستاناي, پاۆلودار, شىعىس جانە سولتۇستىك قازاقستان وبلىستارى.
قونىستاندىرۋ وڭىرلەرىندە 2023 جىلعا ارنالعان قانداستاردى قابىلداۋ كۆوتاسى 2 433 ادامدى قۇرايدى. 2023 جىلعى 1 اقپانداعى جاعداي بويىنشا قونىستاندىرۋ وڭىرلەرىنە 332 قانداس قونىس اۋداردى.
جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى: ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (258,4 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (55,3-دەن 110,7 مىڭ تەڭگەگە دەيىن) مولشەرىندە سوما بەرىلەدى.
جىل باسىنان بەرى 35 قانداسقا ءتۇرلى قولداۋ شارالارى كورسەتىلىپ, تۇراقتى جۇمىسقا ورنالاستىرىلعان.
سولتۇستىككە كوش
سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلدانعان. تۇرعىن ءۇي ساتىپ الۋ, سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50%-ى نەمەسە ءبىر وتباسىنا 4,28 ملن تەڭگەگە دەيىن مولشەرىندە بىرجولعى وتەۋسىز جانە قايتارىمسىز نەگىزدە ەنگىزىلگەن.
جالپى 2023 جىلى پيلوتتىق رەجيمدە قازاقستان ەلشىلىكتەرى ارقىلى «ءبىر تەرەزە» قاعيداتى بويىنشا قانداس مارتەبەسىن بەرۋ تەتىگى ىسكە اسىرىلىپ جاتىر. پيلوتتىق جوبا شەڭبەرىندە ەلىمىزگە بارۋ, جۇمىس ورنى, تۇرعىن ءۇي بەرۋ مۇمكىندىكتەرى تۋرالى ماسەلەنى شەشۋگە جانە رەسپۋبليكا اۋماعىنا كىرمەي-اق قانداس مارتەبەسىن الۋعا بولادى. بۇگىنگى تاڭدا ەتنيكالىق قازاقتاردان جاڭا فورماتتا 6 203 ءوتىنىش قابىلداندى.
