قازاقستان بىرقاتار ەلگە بيداي جەتكىزۋ بويىنشا كەلىسسوزدەردى جالعاستىرىپ جاتىر

وزبەكستان, قحر, ازەربايجان, يران جانە باسقا دا ەلدەرگە قازاقستاننان ساپاسى تومەن بيدايدى جەتكىزۋ بويىنشا كەلىسسوزدەر جالعاسىپ جاتىر.

«قازاقستان بيدايىن ءداستۇرلى تۇردە يمپورتتاۋشىلار قاتارىنا ورتالىق ازيا ەلدەرى (وزبەكستان, تاجىكستان, تۇركىمەنستان) جانە اۋعانستان كىرىپ وتىر. بۇل رەتتە, 2022/2023 ماركەتينگتىك جىلى سوڭعى ون جىلداعى استىق ەكۆيۆالەنتىندەگى بيداي مەن ۇننىڭ رەكوردتىق كولەمى ەكسپورتتالدى – 10 ملن توننا. ونىڭ ىشىندە ورتالىق ازيا ەلدەرىنە – 5,8 ملن توننا (وزبەكستان – 4,3 ملن توننا, تاجىكستان – 1,1 ملن توننا, تۇرىكمەنستان – 0,4 ملن توننا), اۋعانستانعا – 2,6 ملن توننا, قحر-عا – 369,4 مىڭ توننا, ازەربايجانعا – 277,1 مىڭ توننا, يرانعا – 1717,7 مىڭ توننا جانە باسقا ەلدەرگە – 642 مىڭ توننا ەكسپورتتالدى», – دەلىنگەن اۋىل شارۋاشىلىعى مينيسترلىگىنىڭ Kazinform اگەنتتىگىنە بەرگەن جاۋابىندا.

بىلتىر جاۋىن-شاشىننىڭ ازدىعىنا بايلانىستى شارۋالار ءۇشىن وتە كۇردەلى بولدى. ۇلتتىق ستاتيستيكا بيۋروسىنىڭ مالىمەتىنشە, 2023 جىلدىڭ قورىتىندىسى بويىنشا 17 ملن توننا استىق جينالدى (2022 جىلى – 22 ملن توننا), ونىڭ ىشىندە 12,1 ملن توننا بيداي باستىرىلدى. 2022 جىلى 16,4 ملن توننا بيداي جينالعان ەدى. بۇل رەتتە, 2023 جىلعى ەگىننىڭ ەداۋىر بولىگى كلاستىق ەمەس بيدايعا جاتادى.

«بۇل فاكتورلار وسى جىلدىڭ ەكسپورتتىق الەۋەتىنە اسەر ەتپەي قويمايدى. بۇل رەتتە, 2024 جىلعى 24 اقپانداعى جاعداي بويىنشا ماركەتينگتىك ماۋسىمنىڭ باسىنان (2023/24 ج.) استىق ەكۆيۆالەنتىندەگى بيداي مەن ۇن ەكسپورتىنىڭ كولەمى وتكەن جىلدىڭ دەڭگەيىندە قالىپ وتىر, ەكسپورت كولەمى شامامەن 6 ملن توننانى قۇرادى. ونىڭ ىشىندە ورتا ازيا ەلدەرىنە – 3,6 ملن توننا (وزبەكستان – 2,4 ملن توننا, تاجىكستان – 0,8 ملن توننا, تۇرىكمەنستان – 0,3 ملن توننا), اۋعانستانعا – 1,2 ملن توننا, قحر-عا – 481,1 مىڭ توننا, يرانعا – 34,9 مىڭ توننا», – دەپ اتالىپ وتكەن ۆەدومستۆو اقپاراتىندا.

مينيسترلىك مالىمەتىنە قاراعاندا, قازىرگى كەزدە «ازىق-ت ۇلىك كورپوراتسياسى» ۇك» اق وزبەكستان, قحر, ازەربايجان, يران جانە باسقا دا ەلدەردىڭ ساتىپ الۋشىلارىمەن سىنىپتان تىس بيدايدى ساتۋ بويىنشا كەلىسسوزدەردى جالعاستىرىپ جاتىر.