Qazaqstan quramasy voleıboldy otyryp oınaýdan Azııa chempıony atandy

Foto: Týrızm jáne sport mınıstrligi

Qytaıdyń Hanchjoý qalasynda voleıboldy otyryp oınaýdan ótken Azııa chempıonatynyń fınalynda Qazaqstan ulttyq quramasy chempıon atandy, dep habarlaıdy Qandastar.kz aqparat portaly.

Ulttyq qurama Qytaı komandasyn 3:2 esebimen (22:25, 19:25, 25:19, 25:20, 8:5) jeńip, óz tarıhynda alǵash ret Azııa chempıony ataǵyna qol jetkizdi. Jarys barysynda Qazaqstan quramasy irikteý kezeńinde Saýd Arabııasy, Japonııa jáne Aýstralııa komandalaryn, al jartylaı fınalda Taıland quramasyn 3:0 esebimen senimdi túrde jeńdi.

Chempıonat qorytyndysy boıynsha birinshi oryndy Qazaqstan, ekinshi oryndy Qytaı jáne úshinshi oryndy Taıland quramasy ıelendi.

Sondaı-aq chempıonat barysynda joǵary sheberlik kórsetken ulttyq quramanyń birneshe oıynshysy jeke marapattarǵa ıe boldy. Erık Kaskabaev – úzdik dop berýshi, Shyńǵys Medeýov – úzdik lıbero, al Almat Ospanov – úzdik blok qoıýshy atandy.

Atalǵan nátıje boıynsha Qazaqstan jáne Qytaı quramalary 2026 jyly Qytaıda ótetin álem chempıonatyna joldama jeńip aldy. Aıta keteıik, voleıboldy otyryp oınaýdan Azııa chempıonaty 6–15 maýsym aralyǵynda ótti. Jarysqa 8 erler jáne 7 áıelder ulttyq komandasy qatysty.