قازاقستان مەن اۋعانستان پايدالى قازبا كەن ورىندارىن زەرتتەۋ بويىنشا تەحنيكالىق كوميسسيا قۇرادى

فوتو: ۇكىمەت

كابۋل قالاسىندا وتكەن كەزدەسۋدە قر پرەمەر-ءمينيسترىنىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين مەن اۋعانستان يسلام امىرلىگىنىڭ كەن ءوندىرۋ جانە مۇناي ءمينيسترى حەداياتۋللا بادري كەلىسىم جاساستى, دەپ حابارلايدى  qandastar.kz   Dalanews.kzكە سىلتەمە جاساپ.

كەزدەسۋ بارىسىندا تاراپتار وتكەن ءبىر جىل ىشىندە ونەركاسىپ سالاسىنداعى ەكىجاقتى قاتىناستاردىڭ ايتارلىقتاي ىلگەرىلەۋىنە ريزاشىلىقتارىن ءبىلدىردى. سەرىك جۇمانعارين اۋعان تاراپىنا قازاقستاننان جەتكىزىلگەن گەولوگتاردىڭ قاتتى پايدالى قازبالاردىڭ الەۋەتتى كەن ورىندارىن زەرتتەۋ بويىنشا دالالىق جۇمىستارىن ۇيىمداستىرۋعا قولداۋ كورسەتكەنى ءۇشىن العىسىن ءبىلدىردى.

«بۇگىنگى تاڭدا قازاقستان گەولوگيالىق بارلاۋ, قاتتى پايدالى قازبالاردى ءوندىرۋ جانە وڭدەۋ سالاسىندا تاجىريبەسى بار كاسىبي تاۋ-كەن كومپانيالارى پۋلىن قۇردى. بۇل كومپانيالار الەۋەتتى كەن ورىندارىن ىزدەۋگە جانە ينۆەستيتسيا سالۋعا مۇددەلى. وسى باعىتتى تالقىلاۋ ءۇشىن قازاقستاندىق دەلەگاتسيا قۇرامىندا ERG Exploration, Kazakhmys Barlau جانە قازاتومونەركاسىپ كومپانيالارىنىڭ وكىلدەرى كەلدى», — دەدى سەرىك جۇمانعارين.

كەزدەسۋ بارىسىندا اۋعان تاراپى ىنتىماقتاستىقتى ودان ءارى دامىتۋعا جانە قازاقستاندىق مامانداردىڭ زەرتتەۋ جۇمىستارىنا قولداۋ كورسەتۋگە دايىن ەكەنىن جەتكىزدى.

تاراپتار بارلىق تۋىنداعان ماسەلەلەردى جەدەل تالقىلاۋ ءۇشىن بىرلەسكەن تەحنيكالىق كوميسسيا قۇرۋعا ۋاعدالاستى.

مامىر ايىنىڭ سوڭىندا قازاقستان تاراپى اۋعانستاننىڭ باسقا پروۆينتسيالارىنداعى الەۋەتتى كەن ورىندارىن زەرتتەۋ ءۇشىن تاعى ءبىر ماماندار توبىن جىبەرمەك.

سونىمەن قاتار اۋعان تاراپى قازاقستاندىق تاۋ-كەن كومپانيالارىنىڭ سۇرانىسى بويىنشا تابيعي رەسۋرستاردىڭ راستالعان قورى تۋرالى مالىمەتتەر بەرۋگە دايىن ەكەنىن ءبىلدىردى.

سونداي-اق سەرىك جۇمانعارين اۋعانستان يسلام امىرلىگىنىڭ مەملەكەتتىك كومپانيالار باسقارماسىنىڭ باسشىسى احماد دجان بيلالمەن كەزدەستى.

تاراپتار قازاقستاندىق كاسىپورىنداردىڭ اۋعانستان مەملەكەتتىك كومپانيالارىمەن ىنتىماقتاستىعىن كەڭەيتۋ مۇمكىندىكتەرىن تالقىلادى.

140 ملن دوللاردىق كەلىسىمدەر: قازاقستان–اۋعانستان بيزنەس فورۋمىنىڭ قورىتىندىسى

سەرىك جۇمانعارين قازاقستان–اۋعانستان بيزنەس فورۋمىنىڭ اشىلۋىنا قاتىستى. شاراعا وسىمدىك مايى, ماكارون, كۇرىشتەن باستاپ اگرودروندار مەن اككۋمۋلياتورلارعا دەيىنگى تاۋارلاردى ۇسىنعان 25 قازاقستاندىق كومپانيا قاتىستى.

«اۋعانستان ورتالىق جانە وڭتۇستىك ازيا اراسىنداعى ماڭىزدى لوگيستيكالىق حابقا اينالا الادى, ال قازاقستان – ازىق-ت ۇلىك, تەحنولوگيا, ماشينا جاساۋ, حيميا جانە IT ونىمدەرىنىڭ سەنىمدى جەتكىزۋشىسى بولا الادى. الدىمىزعا امبيتسيالى, بىراق قولجەتىمدى ماقسات قويىلدى ياعني, ساۋدا اينالىمىن قىسقا مەرزىمدە 3 ملرد دوللارعا دەيىن جەتكىزۋ. بۇل ماقساتقا جەتۋ ءۇشىن تۇراقتى جەتكىزۋ ارنالارى قۇرىلىپ, ءوزارا ساۋدا نومەنكلاتۋراسى كەڭەيىپ, ينۆەستيتسيالار مەن كاسىپكەرلىك بەلسەندىلىككە قولايلى جاعداي جاسالۋى قاجەت», — دەپ اتاپ ءوتتى ۆيتسە-پرەمەر.

فورۋمنىڭ العاشقى كۇنىنىڭ الدىن الا قورىتىندىسى بويىنشا شامامەن 140 ملن دوللار سوماسىنا كوممەرتسيالىق قۇجاتتارعا قول قويىلدى.