جاڭالىقتار
قازاقستان مەن ازەربايجان پرەزيدەنتتەرى سيان قالاسىنان اپشەرونعا كەلگەن كونتەينەرلى پويىزدى كۇتىپ الدى
قازاقستان مەن ازەربايجان پرەزيدەنتتەرى سيان قالاسىنان اپشەرونعا كونتەينەرلى پويىزدىڭ كەلۋىنە وراي ۇيىمداستىرىلعان سالتاناتتى شاراعا قاتىستى.
قاسىم-جومارت توقاەۆ پەن يلحام اليەۆ سيان قالاسىنداعى قازاقستان مەن قىتايدىڭ جاڭا كولىك-لوگيستيكا ورتالىعىنان شىعىپ, ترانسكاسپي حالىقارالىق كولىك باعىتىمەن (تحكب) اپشەرون ستانتسياسىنا كونتەينەرلى بلوك-پويىزدىڭ كەلۋىنە وراي ۇيىمداستىرىلعان سالتاناتتى شاراعا تەلەكوپىر ارقىلى قاتىستى.
بۇعان دەيىن بيىل 28 اقپاندا سياندا قازاقستان تەرمينالى اشىلىپ, قىتاي – قازاقستان – ازەربايجان باعىتى بويىنشا العاشقى پويىز جولعا شىققان بولاتىن.
مەملەكەت باسشىسى سالتاناتتى شارادا سويلەگەن سوزىندە قازىرگىدەي جاھاندىق گەوساياسي تۇراقسىزدىق جاعدايىندا ەۋرازيانىڭ جاڭا كولىك-لوگيستيكا جۇيەسى قۇرىلىپ جاتقانىن اتاپ ءوتتى. ونىڭ پىكىرىنشە, بۇل پروتسەستە قازاقستان مەن ازەربايجاننىڭ تىعىز ءارى تابىستى ىنتىماقتاستىعى باستى ءرول اتقارادى. بىرلەسكەن كۇش-جىگەردىڭ ارقاسىندا ەكى ەلدىڭ ساۋدا-ەكونوميكالىق الەۋەتى نىعايىپ كەلەدى.
پرەزيدەنت يلحام اليەۆ كولىك سالاسى قىزمەتكەرلەرىن وسى ايتۋلى وقيعامەن قۇتتىقتادى. سونداي-اق قازاقستان مەن ازەربايجان ىنتىماقتاستىقتىڭ كوپتەگەن باعىتى, سونىڭ ىشىندە كولىك-ترانزيت سالاسىنداعى ىقپالداستىقتى نىعايتۋ ءۇشىن بەلسەندى جۇمىس ىستەپ جاتقانىن اتاپ ءوتتى.
سالتاناتتى شارا سوڭىندا ەكى ەل باسشىلارى بىرلەسە جەمىستى جۇمىس اتقارعانى ءۇشىن قازاقستاندىق جانە ازەربايجاندىق ماماندارعا ريزاشىلىعىن ءبىلدىرىپ, تابىس تىلەدى.
