جاڭالىقتار
قازاقستان مەن بەلارۋس قورعانىس مينيسترلەرى بىرنەشە كەلىسىمگە قول قويدى
قازاقستان مەن بەلارۋس قورعانىس مينيسترلەرى اسكەري اۋەايلاقتارىندا اسكەري اۋە كەمەلەرىن قابىلداۋدى, اۋەايلاقتىق-تەحنيكالىق قامتاماسىز ەتۋدى جانە كۇزەتۋدى ۇيىمداستىرۋ تۋرالى كەلىسىمگە قول قويدى, دەپ حابارلادى قازاقستان قورعانىس مينيسترلىگىنىڭ ءباسپاسوز قىزمەتى.
استاناعا بەلارۋس رەسپۋبليكاسى قورعانىس ۆەدومستۆوسىنىڭ باسشىسى گەنەرال-لەيتەنانت ۆيكتور حرەنين رەسمي ساپارمەن كەلدى.
بيىل بەلارۋس رەسپۋبليكاسى شانحاي ىنتىماقتاستىق ۇيىمىنا مۇشەلىككە قابىلداۋ راسىمدەرىن اياقتادى. وسىعان بايلانىستى قازاقستاننىڭ قورعانىس ءمينيسترى بەلارۋس ەلىنىڭ تولىققاندى مۇشە مارتەبەسىن الۋى ۇيىمعا ساپالى جاڭا سەرپىن بەرەتىنىنە سەنىم ءبىلدىردى.
كەزدەسۋ بارىسىندا گەنەرال-پولكوۆنيك رۋسلان جاقسىلىقوۆ پەن گەنەرال-لەيتەنانت ۆيكتور حرەنين جاۋىنگەرلىك دايىندىق, بىرلەسكەن وقۋ-جاتتىعۋلار, اسكەري-سپورتتىق جارىستار وتكىزۋ ماسەلەلەرىنە توقتالدى.
«تمد, ۇقشۇ جانە باسقا دا حالىقارالىق ۇيىمدار شەڭبەرىندە قازاقستان مەن بەلارۋس قورعانىس جانە قاۋىپسىزدىك ماسەلەلەرىندە ءوزارا بەلسەندى ءىس-ارەكەت جاسايدى. قورعانىس سالاسىنداعى ىنتىماقتاستىقتىڭ بۇل ءتۇرى قازاقستان مەن بەلارۋس اراسىنداعى سەنىم مەن دوستىق قاتىناستاردى نىعايتۋعا, وعان قوسا وڭىردەگى قاۋىپسىزدىك پەن تۇراقتىلىقتى قامتاماسىز ەتۋگە ىقپال ەتەدى», – دەدى جاقسىلىقوۆ.
تاراپتاردىڭ ايتۋىنشا, ىنتىماقتاستىقتىڭ نەگىزگى باعىتتارىنىڭ ءبىرى – اسكەري ءبىلىم بەرۋ. بەلارۋس اسكەري جوعارى وقۋ ورىندارىندا قازاقستاندىق وفيتسەرلەر مەن كۋرسانتتار ءبىلىم الىپ ءجۇر. جۋىردا بەلارۋس رەسپۋبليكاسىنىڭ اسكەري اكادەمياسىندا قازاقستان رەسپۋبليكاسىنىڭ اسكەري ونەر اۋديتورياسى اشىلماق.
قورعانىس ءمينيسترى گەنەرال-پولكوۆنيك رۋسلان جاقسىلىقوۆ ارىپتەسىنە بەلارۋس سۋۆوروۆشىلارى العاش رەت قاتىساتىن «ايبىن» X حالىقارالىق اسكەري-پاتريوتتىق جاستار جيىنىن وتكىزۋ باستاماسىن قولداعانى ءۇشىن العىسىن ءبىلدىردى.
ساپار اياسىندا ۆيكتور حرەنين قازاقستان رەسپۋبليكاسىنىڭ ۇلتتىق قورعانىس ۋنيۆەرسيتەتىندە بولدى. وندا جوعارى وقۋ ورنىنىڭ وقۋ-ماتەريالدىق بازاسىمەن تانىسىپ, بەلارۋس اسكەري ونەر اۋديتورياسىن ارالادى.
