«قازاقستان ورىستانىپ بارادى دەيدى, بايقايىنشى دەپ كەلدىم»: ورالمان قىز نەگە ەلگە كەلگەنىن ايتتى

فوتو: ۆيدەو سكرين

تيكتوك جەلىسىندە قازاقستانعا قونىس اۋدارعان ورالمان قىزدىڭ ويى كوپتى تەبىرەنتتى, دەپ جازادى qandastar.kz

«1993 جىلى پاۆلودارعا كوشكەنىمدە «قايدان كەلدىڭ, نەگە كەلدىڭ, نەگە موڭعوليانى تاستادىڭ?» دەپ سۇراقتىڭ استىنا العاندار بولدى. سول سۇراقتار قويىلعاندا  اتاجۇرتىن اڭساپ العاشقىلاردىڭ ءبىرى بولىپ جەتكەن جۋرناليست بەكەن قايرات ۇلىنىڭ «اتامەكەنگە نەگە كەلدىم?»  ولەڭىمەن جاۋاپ بەرەتىن ەدىم.

جان مۇڭىمدى ايتايىنشى دەپ كەلدىم,

قازاق كۇيىن تارتايىنشى دەپ كەلدىم.

قازاقستان ورىستانىپ باراد دەيدى,

راس پا ەكەن بايقايىنشى دەپ كەلدىم.

التىن وردام كورەيىنشى دەپ كەلدىم,

قولىم ۇشىن بەرەيىنشى دەپ كەلدىم.

شەتتە تۋدىم, شەتتە ءوستىم, اعايىن,

ءدال ورتاڭدا ولەيىنشى دەپ كەلدىم», – دەدى ورالمان قىز.

ونىڭ ايتۋىنشا, وسى ولەڭ بار ساۋالعا قالقان ىسپەتتى بولعان.

ايتا كەتەيىك, 2024 جىلعى جاعداي بويىنشا 4 351 ەتنيكالىق قازاق تاريحي وتانىمەن تابىسىپ, قانداس مارتەبەسىن الدى. جالپى 1991 جىلدان بەرى رەسپۋبليكاعا 1 ملن 132,7 مىڭ ەتنيكالىق قازاق ورالعان.جىل باسىنان قازاقستانعا كەلگەن قانداستاردىڭ جارتىسى (51,1%) قىتايدان, 31,9% – وزبەكستاننان, 6,4% – تۇرىكمەنستاننان, 5,4% – موڭعوليادان , 3,7% – رەسەيدەن جانە 1,5% باسقا ەلدەردەن.