Qazaqstan tarıhta alǵash ret dzıýdodan Olımpıada «altynyn» alyp tur

Foto: Salı Sabırov

Qazirge deıin elimizdiń dzıýdo sportynyń sheberleri Jazǵy Olımpıada oıyndarynda eki kúmis, eki qola medalǵa qol jetkizgen edi. Onyń ekeýin Eldos jeńip aldy. Ol 2016 jyly Rıo de Janeıroda kúmis, 2020 jylǵy Tokıoda qola medal oljalaǵan bolatyn.

Al Ashat Jıtkeev (100 keli) 2008 jyly kúmis, Galbadrahyn Otgoneeg (48 keli) 2016 jyly qola júldeger atanǵan edi.

Tokıoda qolany mise tutqan Eldos sol olqylyqtyń ornyn toltyratynyn, endigi maqsaty Olımpıada altyny ekenin aıtqan edi.

«Shyn mánisinde, men mansabymdy 2016 jylǵy Rıo Olımpıadasynan keıin aıaqtaǵym keldi, biraq kúmis medal alyp qaldym. Maǵan tek altyn ǵana kerek. Olımpıadanyń altyn medalin almaı ózimniń jarystaǵy mansabymdy aıaqtamaımyn dep ant berdim. Bul qashan bolatynyn bilmeımin. Eger 40 jasqa deıin kúresýdi jalǵastyrý kerek bolsa, men ony isteımin. Olımpıadanyń altyn medalinsiz men jarys arenasynan ketpeımin», — degen edi Eldos úsh jyl buryn.

Tokıo Olımpıadasynyń joldamasyna ol maýsym aıynda qol jetkizgen edi. Elimizdiń dzıýdo quramasynyń bapkerleri 60 keli salmaqta Maǵjan Shamshadın, Nurqanat Serikbaev jáne Eldos Smetovtiń arasynda irikteý týrnırin ótkizdi. Bul joly tájirıbeli balýan eshbir syr bergen joq. Qos qarsylasyn qapy qaldyryp, joldamaǵa qol jetkizdi.

Parıj Olımpıadasynda ol senimdi oıyn kórsetti. Jalpy Smetov úshin jerebe ońaı bolǵan joq. Irikteýde Tornıke Chkadýany (Nıderland), Dılshot Halmatovty (Ýkraına) jeńdi. Odan keıin shırek fınalda Tokıo Olımpıadasynyń kúmis júldegeri Iang Iý Veıdi (Taıpeı,) jartylaı fınalda álem chempıony, Eýropa chempıonatynyń 3 dúrkin jeńimpazy Fransısko Garrıgostan (Ispanııa) qosymsha ýaqytta (golden score) aılasyn asyrdy.

Fınalda franııalyq Lýka Mheıdzeniń osal tusyn tapty.