قازاقستاندا العاش رەت ادام ساۋداسىمەن كۇرەس تۋرالى زاڭ قابىلداندى

فوتو: اشىق دەرەككوز

پرەزيدەنت قاسىم-جومارت توقاەۆ «ادام ساۋداسىنا قارسى كۇرەس تۋرالى» زاڭعا قول قويدى. بۇل تۋرالى Stan.kz اقپارات اگەنتتىگى حابارلايدى.

قىلمىستىق كودەكستە «ادام ساۋداسىمەن بايلانىستى قىلمىستار» دەگەن جاڭا ۇعىم پايدا بولدى. ولاردىڭ ىشىنە: ادام ۇرلاۋ, زاڭسىز باس بوستاندىعىنان ايىرۋ, ادام ساۋداسى جانە جەزوكشەلىككە تارتۋ كىرەدى. ادام ساۋداسىمەن كۇرەس جونىندەگى ارنايى زاڭ وسى قىلمىستىڭ قۇربانى بولعان قازاقستاندىقتاردى قورعاۋ مەن الەۋمەتتىك قولداۋدى قامتاماسىز ەتەدى.

«زاڭ العاش رەت قابىلدانىپ, ادام ساۋداسىنا قارسى كۇرەستىڭ ۇيىمدىق-قۇقىقتىق نەگىزدەرىن جان-جاقتى ايقىندايدى. ول ادام ساۋداسىنا قارسى ءىس-قيمىلدىڭ ماقساتتارى مەن مىندەتتەرىن, قاعيداتتارىن بەلگىلەيدى, سونداي-اق مەملەكەتتىك ورگانداردىڭ, جەرگىلىكتى اتقارۋشى ورگانداردىڭ جانە باسقا دا سۋبەكتىلەردىڭ ادام ساۋداسىنا قارسى ءىس-قيمىل جونىندەگى قۇزىرەتىن ايقىندايدى», — دەلىنگەن حابارلامادا.

اكىمشىلىك قۇقىق بۇزۋشىلىق تۋرالى كودەكس تە جاڭا باپپەن تولىقتىرىلىپ جاتىر. بالالاردى, ونىڭ ىشىندە جاڭا تۋعان نارەستەلەردى ساتۋ فاكتىلەرىنە قارسى تۇرۋ ءۇشىن 135-1 «لاۋازىمدى تۇلعالاردىڭ جاڭا تۋعان نارەستەنى تاستاپ كەتۋ, جەتىم بالالاردى جانە اتا-اناسىنىڭ قامقورلىعىنسىز قالعان بالالاردى قابىلداۋ جانە جەتكىزۋ فاكتىلەرى تۋرالى حابارلاماۋى» تۋرالى باپ پايدا بولدى.

سونداي-اق مەملەكەت باسشىسى «قازاقستاننىڭ كەيبىر زاڭنامالىق اكتىلەرىنە ادام ساۋداسىنا, بۇزاقىلىققا جانە بوتەننىڭ مۇلكىنە زيان كەلتىرۋگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.

«قىلمىستىق كودەكستە ادام ۇرلاۋ, زاڭسىز باس بوستاندىعىنان ايىرۋ, ادامداردى, ونىڭ ىشىندە كامەلەتكە تولماعانداردى ساۋدالاۋ, جەزوكشەلىكپەن اينالىسۋعا تارتۋ جانە باسقا دا قاۋىپتى ارەكەتتەردى قامتيتىن «ادام ساۋداسىمەن بايلانىستى قىلمىستار» دەگەن جاڭا ۇعىم بەكىتىلدى. مۇنداي قىلمىستاردى جاساعانى ءۇشىن تاتۋلاسۋعا بايلانىستى قىلمىستىق جاۋاپتىلىقتان بوساتۋعا تىيىم سالىنادى», — دەلىنگەن حابارلامادا.

سونىمەن قاتار جاڭا زاڭدا «كامەلەتكە تولماعان ادامنان جەزوكشەلىكپەن اينالىسۋ نەمەسە جىنىستىق سيپاتتاعى قىزمەت الۋ» ءۇشىن قىلمىستىق جاۋاپكەرشىلىك قاراستىرىلعان. زاڭ كامەلەتكە تولماعان ادامدى سەكسۋالدىق قىزمەت كورسەتۋگە, سونىڭ ىشىندە ۇگىت-ناسيحات نەمەسە جارناما ارقىلى تارتۋدى دا قىلمىستىق جاۋاپكەرشىلىككە تارتادى.