قازاقستاندا بلوگەرلەر سالىق تولەي مە: مينيسترلىك جاۋاپ بەردى

فوتو: Adobe Stock

قازاقستاندا بلوگەرلەر قانداي تارتىپپەن سالىق تولەيتىنى بەلگىلى بولدى. بۇل تۋرالى Stan.kz اقپارات اگەنتتىگى حابارلايدى.

قارجى مينيسترلىگى مەملەكەتتىك كىرىستەر كوميتەتى ارنايى سالىق رەجيمدەرى باسقارماسىنىڭ باسشىسى ەرقانات شىنبەرگەن الەۋمەتتىك جەلىلەر ارقىلى جۇمىس ىستەيتىن بلوگەرلەرگە سالىق سالۋ قالاي جۇرگىزىلەتىنىن ايتىپ بەردى.

ونىڭ ايتۋىنشا, ينتەرنەت-پلاتفورمالاردا جۇمىسپەن قامتۋ اياسىندا جەكە تۇلعالار 33 قىزمەت ءتۇرىن اتقارا الادى. الايدا, الەۋمەتتىك كودەكستە بەلگىلەنگەن ينتەرنەت-پلاتفورما ۇعىمىندا الەۋمەتتىك جەلىلەر جوق, سوندىقتان بلوگەرلەر قازىر مەملەكەتتىك كىرىستەر كوميتەتىنىڭ قۇزىرىندا ەمەس.

«بۇل ياندەكس, Glovo جانە Wolt سياقتى ينتەرنەت-پلاتفورمالاردى قامتيدى, بۇل جەردە كىرىس ينتەرنەت-پلاتفورمانىڭ وزىندە ەمەس, جارناما بەرۋشىلەردەن كەلەدى. قازىر بۇل ماسەلە دە رەتتەلىپ, بلوگەرلەرگە ساراپتاما جاسالىپ, حالىقارالىق تاجىريبەلەر دە زەرتتەلۋدە», – دەدى ەرقانات شىنبەرگەن.

ونىڭ ايتۋىنشا, قازاقستاندا بلوگەرلەردىڭ بارلىعى دەرلىك جەكە كاسىپكەر رەتىندە تىركەلگەن.

«تاعى ءبىر ماسەلە – ولار ءوز كىرىستەرىن تولىق كورسەتە مە? بۇل باعىتتا جۇمىستار جۇرگىزىلۋدە. بارلىعىندا تىركەۋ بار, ويتكەنى ولار تىركەلۋگە مىندەتتى. بىراق, بۇل ينتەرنەت-پلاتفورمالار سياقتى بولەك سەگمەنت ەمەس, جالپى بيزنەس رەتىندە جۇرەدى. بۇل بولەك رەتتەلمەگەن, «ونلاين پلاتفورمالار جانە ونلاين جارناما تۋرالى» زاڭ بار, وندا سالىق تۋرالى ەمەس, تەك قىزمەت تۋرالى ايتىلادى», – دەدى مينيسترلىك وكىلى.

ەسكە سالساق, بۇاعان دەيىن قازاقستاندا 2026 جىلدان باستاپ جاڭا سالىق كودەكسى ىسكە قوسىلاتىنى تۋرالى جازعان ەدىك.