قازاقستاندا ءدارى-دارمەك قىمباتتادى: كاسىپكەرلەر بۇعان تاڭبالاۋ جۇيەسى سەبەپ ەكەنىن ايتتى

فوتو:depositphotos.com

قازاقستاندا ءدارى-دارمەك قىمباتتادى. دەرەكتەرگە سەنسەك, رەسپۋبليكا بويىنشا ءدارى-دارمەك باعاسى ءبىر جىلدا 10,5%-عا وسكەن. دارىگەر قىزمەتىنىڭ باعاسىندا دا ءوسىم بايقالادى. بۇل تۋرالى qandastar.kz اقپارات اگەنتتىگى 31-ارنانىڭ ينفورمبيۋرو باعدارلاماسىنا سىلتەمە جاساپ حابارلايدى.

قازاقستاندا ەلگە قاجەتتى ءدارى-دارمەكتىڭ 20% عانا وندىرىلەدى. باسقا بارلىق پوزيتسيالار بويىنشا ەلىمىز تولىعىمەن شەتەلدىك كومپانيالارعا تاۋەلدى. ءدارى-دارمەك باعاسىنا دوللار باعامى دا ايتارلىقتاي اسەر ەتكەن. ويتكەنى, ديستريبيۋتورلىق جانە كوتەرمە ساۋدا كومپانيالارى وندىرۋشىلەرمەن شەتەل ۆاليۋتاسىندا كەلىسىمشارت جاسايدى. مىسالى, ءبىر جىل ىشىندە ەڭ تانىمال دارىلەردىڭ, سونىڭ ىشىندە اتسەتيلساليتسيل قىشقىلىنىڭ باعاسى 28%-عا دەرلىك وسكەن.

“اتسەتيلساليتسيل قىشقىلى. بارلىعىنا دەرەكتەردىڭ ماتريتسالىق كودىن ەنگىزۋ قاجەت. تەرميالىق ادىسپەن جاساۋ ءۇشىن 200 گرادۋسقا جۋىق جوعارى تەمپەراتۋرانى قاجەت ەتەدى. بۇل پرەپاراتقا تەرىس اسەر ەتۋى مۇمكىن. سايكەسىنشە, بارلىعىن بولەك باسىپ شىعارىپ, ءار قاپتاماعا جەكە-جەكە جابىستىرۋ كەرەك. بۇل باعانى قىمباتتاپ جاتىر”, – دەيدى قازاقستاندىق تاۋەلسىز ءدارىحانالار قاۋىمداستىعىنىڭ توراعاسى تالعات وماروۆ.

جىل باسىنان بەرى الماتىدا 100-دەن اسا ءدارىحانا جابىلىپ قالعان. ءدارىحانا يەلەرى جاڭا ەنگىزىلگەن ليتسەنزيالاۋ ەرەجەسىنە بايلانىستى ءدارى-دارمەك تاپشىلىعى دا بار ەكەنىن اتاپ ءوتتى.

“قازىر قىس مەزگىلى. ۆيرۋسقا قارسى پرەپاراتتارىمىزدىڭ جارتىسى نارىقتان جوعالىپ كەتتى. ەكى سەبەپ بار: تاڭبالاۋ جانە سەرتيفيكاتتاۋ. رەسمي تۇردە نارىقتا جوق دارىلەردىڭ بارلىعىن كەز كەلگەن ونلاين پلاتفورمادان ساتىپ الۋعا بولادى. قازاقستاننىڭ تۇكپىر-تۇكپىرىندەگى شاعىن ءدارىحانالار مەن ۇيلەردىڭ جانىنداعى ءدارىحانالار ۇلكەن جەلىلەردىڭ باسەكەلەستىگىنە توتەپ بەرە الماي جابىلىپ جاتىر”, – دەيدى دارىحانا يەلەرىنىڭ باستاماشىل توبىنىڭ وكىلى كاميللا كوبەريدزە.

ەلىمىزدەگى دارىگەرلىك امبۋلاتوريالارداعى مەديتسينا ماماندارىنىڭ قىزمەتى دە 10%-عا دەرلىك, مەديتسينالىق زەرتحانالار مەن رەنتگەندىك اپپاراتتار – 11,5%-عا, ءتىس دارىگەرلەرىنىڭ قىزمەتى 13%-عا قىمباتتاعان.