قازاقستاندا ەرلى-زايىپتىلاردىڭ اجىراسۋ پروتسەسى قيىندايدى

فوتو: اشىق دەرەككوز

قازاقستاندا وتباسى ينستيتۋتىن نىعايتۋ جانە اجىراسۋدىڭ الدىن الۋ بويىنشا جول كارتاسى ازىرلەنىپ جاتىر, – دەپ حابارلايدى Massaget.kz ءتىلشىسى قر مادەنيەت جانە اقپارات مينيسترلىگىنە سىلتەمە جاساپ.

قۇجاتتى دايىنداۋ بارىسىندا ءارتۇرلى مينيسترلىكتىڭ ماماندارى, «ازاماتتارعا ارنالعان ۇكىمەت «مەملەكەتتىك كورپوراتسياسى» كەاق جانە وتباسىلىق قاتىناستار سالاسىنداعى ساراپشىلار جۇمىس ىستەيدى. استانادا ولاردىڭ العاشقى بىرلەسكەن وتىرىسى ءوتتى.

شەشىمدەردىڭ ءبىرى نەكە قاتىناستارىن رەتتەۋ جونىندەگى ءىس جۇرگىزۋ نورمالارىن قاتاڭداتۋدى كوزدەيدى. ساراپشىلاردىڭ پىكىرىنشە, اجىراسۋ پروتسەسىنىڭ جەڭىلدەتىلگەن اۆتوماتتاندىرىلعان جۇيەسى مەدياتيۆتىك جۇمىستى جۇرگىزۋدى قيىنداتادى», – دەلىنگەن حابارلامادا.

نەكەنىڭ داعدارىستىق كەزەڭدەرىن ەڭسەرۋ ءۇشىن ماماندار ەرلى-زايىپتىلارعا پرەناتالدى ءبىلىم بەرۋ, سانالى اتا-انا بولۋ, وتباسىلىق ءومىر تۋرالى كەڭەس بەرۋ ءۇشىن تسيفرلىق پلاتفورما ازىرلەۋدى ۇسىنادى.

پيلوتتىق رەجيمدە استانا مەن شىمكەنتتە نەكەگە دەيىنگى تەگىن كەڭەس بەرۋ جوباسى ىسكە قوسىلدى. داعدارىس كەزىندە وتباسىلاردى قولداۋ شارالارىنىڭ ءبىرى دەكرەتتىك دەمالىستاعى ايەلدەرگە ارنالعان وقىتۋ كۋرستارى بولۋى مۇمكىن.

سونىمەن قاتار, وتباسى ينستيتۋتىن نىعايتۋ ءۇشىن ماماندار مەكتەپتەر مەن كوللەدجدەردى وقىتۋ باعدارلاماسىنا وتباسىلىق تاربيە بويىنشا ارنايى كۋرستاردى ەنگىزۋ مۇمكىندىگىن قاراستىرىپ جاتىر.

جول كارتاسىنا قازاقستاندىقتاردىڭ رەپرودۋكتيۆتى دەنساۋلىعىن نىعايتۋ جونىندەگى شارالار دا ەنگىزىلەدى.