Qazaqstanda ortasha zeınetaqy – 143 myń teńge

Foto: ashyq derekkóz

Qazaqstanda jyl basynan beri 1 trıllıonnan astam teńge zeınetaqyǵa jumsaldy, dep habarlaıdy qandastar.kz

Eńbekmıniniń málimetinshe, 2025 jyldyń basynan beri respýblıkalyq bıýdjetten zeınetaqy tólemderine 1 trln 44,3 mlrd teńge bólindi. Onyń ishinde:

• 337,6 mlrd teńge – bazalyq zeınetaqyǵa,

• 706,7 mlrd teńge – yntymaqty zeınetaqy tólemderine baǵyttalǵan.

2025 jylǵy 1 sáýirdegi jaǵdaı boıynsha elimizde 2,5 mln-ǵa jýyq zeınetker tirkelgen.

Sol kúngi eseppen jıyntyq zeınetaqynyń ortasha mólsheri 143 622 teńgeni qurady. Onyń ishinde:

• yntymaqty zeınetaqy – 95 963 teńge,

• bazalyq zeınetaqy – 47 659 teńge boldy.

Buǵan deıin 2025 jylǵy 1 qańtardan bastap:

• bazalyq zeınetaqy 6,5%-ǵa,

• yntymaqty zeınetaqy 8,5%-ǵa óskeni habarlanǵan edi.

Memleket basshysynyń tapsyrmasyna sáıkes, 2023 jyldan bastap bazalyq zeınetaqyny kezeń-kezeńimen arttyrý jalǵasýda. 2025 jyldyń 1 qańtarynan bastap:

• bazalyq zeınetaqynyń eń tómengi mólsheri kúnkóris deńgeıiniń 70%-na deıin (32 360 teńge),

• eń joǵary mólsheri 110%-na deıin (50 851 teńge) jetkizildi.