قازاقستاندا پەداگوگتەردىڭ ەڭبەك اقىسىن تولەۋ قورىنان بيۋدجەت قاراجاتىن جىمقىرۋ سحەمالارى انىقتالدى

فوتو: stan.kz

سىبايلاس جەمقورلىق تاۋەكەلدەرىنە تالداۋ جۇرگىزۋ بارىسىندا مۇعالىمدەردىڭ ەڭبەكاقى قورىنان بيۋدجەت قاراجاتىن ۇرلاۋ سحەمالارى انىقتالدى. بۇل تۋرالى qandastar.kz stan.kz اقپارات اگەنتتىگىنە سىلتەمە جاساپ حابارلايدى.

انتيكور مالىمەتىنشە, بيۋدجەت قاراجاتىن جوسپارلاۋ جانە يگەرۋ كەزەڭدەرىندە پەداگوگتەردىڭ ەڭبەگىنە اقى تولەۋ قورىنان بيۋدجەت قاراجاتىن جىمقىرۋ سحەمالارى اشىلدى.

«كوپتەگەن فاكتىلەر بيۋدجەتتىك وتىنىمدەردى قالىپتاستىرۋ پروتسەستەرىن اۆتوماتتاندىرۋدىڭ, بۇزۋشىلىقتاردى باقىلاۋ جانە الدىن الۋ تەتىكتەرىنىڭ بولماۋىنان, سونداي-اق اقپاراتتىق جۇيەلەردىڭ بولشەكتەنۋىنەن مۇمكىن بولدى. سىبايلاس جەمقورلىقتىڭ سەبەپتەرى مەن شارتتارىن جويۋ ماقساتىندا ءبىلىم, قارجى جانە تسيفرلىق دامۋ مينيسترلىكتەرىمەن بىرلەسە وتىرىپ جول كارتاسى جۇزەگە اسىرىلىپ جاتىر. كەشەندى جۇمىس اياسىندا بيۋدجەتتى جوسپارلاۋ پروتسەسىن تسيفرلاندىرۋ ءۇشىن قۇقىقتىق جاعدايلار جاسالعان», – دەلىنگەن حابارلامادا.

ەڭ الدىمەن «بۋحگالتەرلىك وپەراتسيالاردىڭ بىرىڭعاي قايماسى» جوباسى ەنگىزىلىپ, ۇلتتىق ءبىلىم بەرۋ بازاسىندا مەملەكەتتىك ورگاندارمەن ينتەگراتسيالانعان «پەداگوگ پورتفوليوسى» ەلەكتروندى ءمودۋلى ازىرلەندى.

«سونداي-اق ساتىپ الىناتىن بۋحگالتەرلىك ەسەپ جۇيەلەرىنە بىرىڭعاي تەحنيكالىق تالاپتار قاراستىرىلعان. تاۋەكەلدەردى باسقارۋ جۇيەلەرى ەنگىزىلگەن. ەنگىزىلگەن تسيفرلىق شەشىمدەردىڭ ارقاسىندا وبلىستىق باسقارمالار مەن ءبىلىم باسقارمالارى بۋحگالتەرلىك ەسەپ پەن قازىناشىلىق جۇيەلەرىنىڭ ەسەپتەرىن اي سايىن سالىستىرىپ وتىرادى», – دەلىنگەن انتيكور حابارلاماسىندا.

سونىمەن قاتار مەملەكەتتىك اۋديت ورگاندارى مۇعالىمدەردىڭ ەڭبەكاقى تولەۋ قورىنان تولەنەتىن كۇدىكتى تولەمدەردى قاشىقتان باقىلاۋدى ەنگىزدى. ولار جالاقىنىڭ كوتەرىلۋىنە جانە جەكە بانكتىك دەرەكتەردىڭ بۇرمالانۋىنا بايلانىستى.

«ەندى ءاربىر تولەم وپەراتسياسى ءوزىنىڭ ەلەكتروندى ءىزىن قالدىرادى, بۇل جىمقىرۋدى اناليتيكالىق جولمەن انىقتاۋعا مۇمكىندىك بەرەدى», – دەلىنگەن حابارلامادا.

انتيكور مالىمەتىنشە, بيىل بيۋدجەتتىك ۇدەرىستەردى اۆتوماتتاندىرۋعا, قازىناشىلىق جۇيەسىن ءبىلىم بەرۋ ۇيىمدارىنىڭ ەسەپ جۇيەلەرىمەن ينتەگراتسيالاۋعا, تولەم قۇجاتتارىنا قول قويۋ كەزىندە بيومەتريانى ەنگىزۋگە باعىتتالعان تسيفرلىق شەشىمدەر ەنگىزىلدى. بۇل شارالار قاراجاتتىڭ جۇمسالۋىنا ءتيىمدى باقىلاۋ ورناتۋعا مۇمكىندىك بەرەدى دەيدى.

«ەگەر جوبانى جۇزەگە اسىرعانعا دەيىن «انتيكور» 2023 جىلعى ىستەر بويىنشا انىقتاعان زالال ميللياردتاعان دوللارمەن (17,3 ميلليارد) ولشەنسە, 2024 جىلى ۇرلىق ايتارلىقتاي ازايدى (7,3 ميلليون). قازىر اگەنتتىك ءبىلىم بەرۋ ۇيىمدارىنىڭ قىزمەتكەرلەرى اراسىندا قارجىلىق قۇقىق بۇزۋشىلىقتاردىڭ الدىن الۋعا باعىتتالعان اقپاراتتىق-ءتۇسىندىرۋ جۇمىستارىن جۇرگىزىپ جاتىر. بۇل باعىتتاعى جۇمىس جالعاسىن تاۋىپ وتىر», – دەلىنگەن انتيكور حابارلاماسىندا.