جاڭالىقتار
قازاقستاندا سوتقا قاتىسقانى ءۇشىن القابيلەرگە قانشا اقى تولەنەدى
«القابيلەر تۋرالى» زاڭعا سايكەس, 25 جاستان اسقان كەز كەلگەن قازاقستاندىق سوتقا القابي رەتىندە قاتىسۋعا شاقىرىلۋى مۇمكىن. مۇنداي شاقىرتۋدى ەلەۋسىز قالدىرۋعا بولمايدى – بۇل ءۇشىن اكىمشىلىك كودەكستىڭ 655-بابىنا سايكەس 10 ايلىق ەسەپتىك كورسەتكىش مولشەرىندە (2024 جىلى 36 920 تەڭگە) ايىپپۇل سالىنادى. سوندىقتان سوتقا شاقىرعان كەزدە بارۋعا تۋرا كەلەدى. دەگەنمەن قازاقستاندىقتاردىڭ قاتىسۋدان باس تارتۋعا مۇمكىندىگى بار.
القابيلەر تۋرالى زاڭنىڭ 10-بابىنىڭ 3-تارماعىنا سايكەس ولار مىنالار: ەگەر ازامات سوت تالقىلاۋى وتەتىن ءتىلدى بىلمەسە; ەگەر ازامات ءوزىنىڭ دەنە نەمەسە پسيحيكالىق كەمىستىگىنە بايلانىستى مىندەتتەرىن ورىنداي الماسا; ەگەر ازامات الپىس بەس جاستان اسقان بولسا; ەگەر ازامات ءدىن قىزمەتكەرى بولسا.
بۇدان بولەك, «كازاحستان پودەشەۆلە» Telegram-ارناسىنىڭ اۆتورلارى اتاپ وتكەندەي, 3 جاسقا دەيىنگى بالالارى بار القابي ايەل مەن ءدىني سەنىمدەرى بويىنشا سوتقا قاتىسا المايمىن دەپ ەسەپتەيتىن ادامدار مىندەتتەرىنەن بوساتىلۋى مۇمكىن. سونداي-اق دارىگەرلەر, مۇعالىمدەر, اۋە كومپانيالارىنىڭ ۇشقىشتارى جانە جۇمىستان الشاقتاۋى قوعامدىق جانە مەملەكەتتىك مۇددەلەرگە زيان تيگىزۋى مۇمكىن باسقا تۇلعالار دا بوساتىلۋى ىقتيمال.
دەگەنمەن القابيلەردىڭ قىزمەتى ۆولونتەرلىككە جاتپايدى جانە سوتقا قاتىسقان ءاربىر كۇنگە اقى تولەنەدى. القابيلەر اۋداندىق سۋديانىڭ جارتى جالاقىسىن الادى – كۇنىنە شامامەن 18 000 تەڭگە.
سونداي-اق القابيلەرگە قىلمىستىق ءىس قارالاتىن جەرگە بارۋعا قاجەت ءىسساپار شىعىستارى وتەلەدى. بۇل رەتتە القابيلەردىڭ جۇمىس ورنى, لاۋازىمى ساقتالادى جانە ەڭبەك ءوتىلى ەسكەرىلەدى. ولاردى جۇمىستان شىعارۋعا نەمەسە تومەن جالاقى الاتىن لاۋازىمعا اۋىستىرۋعا بولمايدى.
