Qazaqstanda sotqa qatysqany úshin alqabılerge qansha aqy tólenedi

«Alqabıler týraly» zańǵa sáıkes, 25 jastan asqan kez kelgen qazaqstandyq sotqa alqabı retinde qatysýǵa shaqyrylýy múmkin. Mundaı shaqyrtýdy eleýsiz qaldyrýǵa bolmaıdy – bul úshin Ákimshilik kodekstiń 655-babyna sáıkes 10 aılyq eseptik kórsetkish mólsherinde (2024 jyly 36 920 teńge) aıyppul salynady. Sondyqtan sotqa shaqyrǵan kezde barýǵa týra keledi. Degenmen qazaqstandyqtardyń qatysýdan bas tartýǵa múmkindigi bar.

Alqabıler týraly zańnyń 10-babynyń 3-tarmaǵyna sáıkes olar mynalar: eger azamat sot talqylaýy ótetin tildi bilmese; eger azamat óziniń dene nemese psıhıkalyq kemistigine baılanysty mindetterin oryndaı almasa; eger azamat alpys bes jastan asqan bolsa; eger azamat din qyzmetkeri bolsa.

Budan bólek, «Kazahstan podeshevle» Telegram-arnasynyń avtorlary atap ótkendeı, 3 jasqa deıingi balalary bar alqabı áıel men dinı senimderi boıynsha sotqa qatysa almaımyn dep esepteıtin adamdar mindetterinen bosatylýy múmkin. Sondaı-aq dárigerler, muǵalimder, áýe kompanııalarynyń ushqyshtary jáne jumystan alshaqtaýy qoǵamdyq jáne memlekettik múddelerge zııan tıgizýi múmkin basqa tulǵalar da bosatylýy yqtımal.

Degenmen alqabılerdiń qyzmeti volonterlikke jatpaıdy jáne sotqa qatysqan árbir kúnge aqy tólenedi. Alqabıler aýdandyq sýdıanyń jarty jalaqysyn alady – kúnine shamamen 18 000 teńge.

Sondaı-aq alqabılerge qylmystyq is qaralatyn jerge barýǵa qajet issapar shyǵystary óteledi. Bul rette alqabılerdiń jumys orny, laýazymy saqtalady jáne eńbek ótili eskeriledi. Olardy jumystan shyǵarýǵa nemese tómen jalaqy alatyn laýazymǵa aýystyrýǵa bolmaıdy.