قازاقستاندا تاعى ءبىر ءتىل رەسمي مارتەبەگە يە بولۋى مۇمكىن

فوتو: اشىق دەرەككوز

قازاقستاندا قازاق ىمداۋ ءتىلى مەن داكتيل ءالىپبيىن – قول مەن ساۋساقتاردىڭ قيمىلى ارقىلى ارىپتەر مەن سوزدەردى جەتكىزۋ جۇيەسىن – ازىرلەۋ جۇمىسى باستالدى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

بۇل تۋرالى پرەمەر-ءمينيستردىڭ ورىنباسارى ەرمەك كوشەرباەۆ دەپۋتاتتىق ساۋالعا بەرگەن رەسمي جاۋابىندا مالىمدەدى. ونىڭ ايتۋىنشا, تولىققاندى ۇلتتىق ىمداۋ ءتىلىن قالىپتاستىرۋ – ەستۋ قابىلەتى شەكتەۋلى ادامدار ءۇشىن تەڭ مۇمكىندىكتەردى قامتاماسىز ەتۋدەگى ماڭىزدى قادام بولماق.

قازىرگى تاڭدا ەلىمىزدە رەسمي تۇردە تانىلعان قازاق ىمداۋ ءتىلى جوق. بۇل جاعداي ەستىمەيتىن جانە ناشار ەستيتىن ازاماتتاردىڭ بىلىمگە, الەۋمەتتىك قىزمەتتەرگە جانە قوعام ومىرىنە تولىققاندى ارالاسۋىنا ەداۋىر كەدەرگى كەلتىرىپ وتىر.

“قازاق ىمداۋ ءتىلىن ازىرلەۋ بارىسىندا حالىقارالىق تاجىريبەگە سۇيەنەمىز. ۇلىبريتانيا, يسلانديا, اۋستراليا, جاڭا زەلانديا, نورۆەگيا, يسپانيا, شۆەتسيا جانە وڭتۇستىك افريكا سەكىلدى ەلدەردە ىمداۋ ءتىلى رەسمي تۇردە تانىلعان جانە كەڭىنەن قولدانىلادى. قازاقستاننىڭ شەتەلدەگى وكىلدىكتەرىنىڭ كومەگىمەن ۇزدىك تاجىريبەلەر زەرتتەلىپ, ولار ۇلتتىق ەرەكشەلىكتەرىمىزگە بەيىمدەلەتىن بولادى, – دەدى كوشەرباەۆ.

جوبا اياسىندا داكتيل ءالىپبيىن ازىرلەۋ, ىمداۋدىڭ سوزدىگىن قۇراستىرۋ, سونداي-اق ىمداۋ ءتىلى اۋدارماشىلارىن دايارلايتىن ءبىلىم بەرۋ باعدارلامالارىن ىسكە قوسۋ كوزدەلىپ وتىر. سونىمەن قاتار, مەكتەپتەر مەن الەۋمەتتىك مەكەمەلەردە قولدانۋعا ارنالعان ارنايى وقۋلىقتار مەن ادىستەمەلىك قۇرالدار ازىرلەنەدى.

ايتا كەتسەك, قازاق داكتيل ءالىپبيى العاش رەت 1998 جىلى جارىق كوردى جانە ول ءبىلىم, مادەنيەت جانە دەنساۋلىق ساقتاۋ مينيسترلىكتەرى بەكىتكەن ەستۋ قابىلەتى بۇزىلعان بالالارعا ارنالعان مەكتەپتەردىڭ دايارلىق سىنىپتارىنا ارنالعان «الىپپە» وقۋلىعىندا قولدانىلدى.