قازاقستاندا جاڭا پاتەرلەردىڭ باعاسى ءوسىپ جاتىر

فوتو: pixabay.com

ەلىمىزدە جاڭا پاتەرلەردىڭ باعاسى ءوسىپ جاتىر. اسىرەسە, استانا مەن الماتىدا 8 پايىزعا ءوسىپ شىعا كەلگەن, دەپ جازدى qandastar.kz

مۇنى ساراپشىلار ءبىرىنشى كەزەكتە قۇرىلىس ماتەريالدارىنىڭ قىمباتتاۋىمەن بايلانىستىرادى. بۇل تۋرالى Stan.kz اقپارات اگەنتتىگى كتك ارناسىنا سىلتەمە جاساپ حابارلايدى.

جىل سوڭىنا دەيىن جاڭا پاتەرلەردىڭ قۇنى تاعى 15-20 پايىزعا كوتەرىلۋى مۇمكىن دەيدى ماماندار.

قازىر ەلىمىزدە پاتەر قىمباتشىلىعى بويىنشا الماتى ءبىرىنشى ورىندا. مۇندا ءبىر بولمەلى ءۇيدىڭ باعاسى 20 ميلليوننان باستالادى. ونىڭ ءوزى شەت اۋدانداردا. ال ورتالىقتان باسپانالى بولعىسى كەلگەندەردىڭ قالتاسىندا 25-30 ميلليون تەڭگەسى بولۋى كەرەك. وندا دا ەسكى ۇيلەردەگى پاتەر. ال, جاڭا تۇرعىن ءۇي كەشەندەرىندەگى باسپانا ءتىپتى قولجەتىمسىز. ولاردىڭ قۇنى جىل باسىنان بەرى 8 پايىزعا كوتەرىلىپتى.

“تەڭگەنىڭ قۇنسىزدانۋىمەن بايلانىستىرۋشى ەدىم. سوڭعى ۋاقىتتا تەڭگەنىڭ تۇراقسىزدىعى بايقالادى. بۇل ۆاليۋتالىق تاۋەكەلدەرگە بايلانىستى قىمباتتاپ وتىر دەۋگە نەگىز بار. ەكىنشى ماسەلە, جىل باسىنان باستاپ قوسىلعان قۇن سالىعىنىڭ توڭىرەگىندە ايتىلىپ جاتقان ويلار”, – دەيدى ەكونوميست ماقسات حالىق.

قازىر الماتىدا ەكونوم-كلاستاعى ۇيلەر ءوتىمدى. اسىرەسە ەكى بولمەلى, اۋماعى 50-55 شارشى مەتردى قۇرايتىن ۇيلەر. قالادا جاڭا پاتەرلەردىڭ ءبىر شارشى مەترىنىڭ ورتاشا باعاسى 589 مىڭ تەڭگە. جاڭا پاتەرلەردىڭ قىمباتتاۋى تۇرعىن ءۇي نارىعىنا كەرى اسەر ەتىپ ۇلگەرگەن. ياعني سۇرانىس ەداۋىر ازايىپتى. جىل سوڭىنا دەيىن باعا تاعى كوتەرىلەدى دەيدى ماماندار.

“قازىر سۇرانىس ازايۋدا, جاڭا تۇرعىن ءۇي كەشەندەرىنە. جىلدىڭ سوڭىنا دەيىن, ارينە, جاڭا تۇرعىن ءۇي كەشەندەرىندە باعا كوتەرىلەدى. ءبارىنىڭ باعاسى كوتەرىلىپ جاتىر, ماتەريالداردىڭ دا باعاسىدا جوعارى. جىل باسىندا 5-7 پايىز بولسا, تاعى دا 10-15 پايىزعا كوتەرىلەدى”, – دەيدى جىلجىمايتىن م ۇلىك اگەنتتىگىنىڭ باس مامانى ايگەرىم قۇدايبەرگەنوۆا.

استانادا دا پاتەرلەر 15 پايىزعا دەيىن قىمباتتاپتى. بىراق بۇل ەلوردالىقتاردىڭ ءۇي الۋىنا توسقاۋىل ەمەس.

“باعا 12-15 پايىزعا ءوستى. بۇگىندە جاعداي تۇراقتى, باسپاناعا سۇرانىس ازايعان جوق. ءبىر جانە ەكى بولمەلى پاتەرلەر ارقاشان سۇرانىسقا يە. قۇرىلىس كومپانيالارى تۇرعىن ءۇي باعاسىن جىل باسىندا كوتەرگەن. ياعني بۇل جاعداي جىل سوڭىنا دەيىن ساقتالۋى كەرەك”, – دەيدى ريەلتور نازگۇل اقىلبەكوۆا.

وڭىرلەردە دە پاتەر قولجەتىمسىز بولىپ بارادى. باسپانا باعاسى كوكشەتاۋ مەن پاۆلوداردا ايتارلىقتاي ءوسىپتى. ال, ساراپشىلار ءۇيدى قىس اياعىندا, ياعني قاڭتار مەن اقپان ايلارىندا العان دۇرىس دەيدى. ءدال قازىر يپوتەكامەن ءۇي الۋ ءتيىمسىز. ەكونوميستەر قولما-قول قاراجاتى بار ازاماتتارعا عانا پاتەر الۋعا كەڭەس بەرەدى.